२९ मंसिर, मेचीनगर : जिल्लाकै पुरानो सहकारी महेन्द्रद्वार सहकारी संस्था लि को ३३औं वार्षिक साधारण सभा आज सम्पन्न भएको छ । प्रमुख अतिथि मेचीनगर नगरपालिकाका प्रमुख गोपालचन्द्र बुढाथोकीले देशको अर्थतन्त्र सुधार गर्न स्वदेशी उत्पादनमा जोड दिदै परनिर्भरताको अन्त्य गर्नुपर्ने बताउनु भएको छ ।
वहाँले स्वदेशी उत्पादन निर्यात शुन्य सरह हुनु र विदेशी उत्पादन आयत अत्याधिक हुनुले देशको अर्थतन्त्रमा प्रतिकुल असर परेको भन्दै अब परनिर्भरताको अन्त्य गर्नुपर्ने कुरामा जोड दिनु भयो ।
मेचीनगर–६ स्थित काँकरभिट्टामा कार्यालय रहेको संस्थाको अध्यक्ष राजकुमार दाहाल(राजु)ले उद्घाटन सत्रको अध्यक्षता गदैं सञ्चालक समितिको तर्फबाट अध्यक्षको प्रतिवेदन प्रस्तुत गर्नुभएको थियो । त्यस्तै लेखा समितिका संयोजक गिरीराज धमलाले लेखा समितिको प्रतिवेदन प्रस्तुत गर्नुभएको थियो ।
कार्यक्रममा मेचीनगर ४ का वडाध्यक्ष अर्जुनकुमार कार्की, मेचीनगर ६ का वडाध्यक्ष ललितबहादुर तामाङ, जिल्ला सहकारी संघ सञ्चालक समिति सदस्य नारायण गौतम, राष्ट्रिय सहकारी बैक धुलाबारी शाखा प्रमुख मुना घिमिरे, काँकरभिट्टा सहकारी संस्था अध्यक्ष भुपाल सिवाकोटीलगायतले शुभकामना मन्तव्य राख्नु भएको थियो ।
कार्यक्रमा संस्थाका विभिन्न जिम्मेवारीमा रहेर जनप्रतिनिधिमा निर्वाचित गिरीराज धमला, कुन्दन निरौला, विष्णु भट्टराईलगायत विभिन्न व्यक्तित्वहरूलाई सम्मान गरिएको संस्थाका अध्यक्ष राजकुमार दाहाल(राजु) ले बताउनु भयो । ।
संस्थाका सदस्य प्रकाश ढुङ्गानाले सञ्चालन गर्नुभएको कार्यक्रममा स्वागत मन्तव्य उपाध्यक्ष युद्धराज ओलीले राख्नु भएको थियो ।
