काँकरभिट्टा,५ फागुन | अबैधरुपमा नेपाल भित्रियाउदैं गर्दा एउटा ट्याक्टरसहित ठूलो परिमाणको आलु सशस्त्र प्रहरीले नियन्त्रणमा लिइएको छ । ट्याक्टरले सवै बत्ती निभाएर शंकाष्पदरुपमा नेपाल ल्याउँदै गर्दा प्रहरीले आलुसहित ट्याक्टर नियन्त्रणमा लिइएको हो ।
मेचीनगर— ७ स्थित नेपाल भारतसीमाक्षेत्र अन्तर्गत पिल्लर ९२ को ५ सीमा इलाकाबाट करीव १ सय बोरा आलुसहित मे १ त ५०१८ नम्बरको ट्याक्टर सशस्त्र प्रहरी बल नेपाल बोडर आउट पोस्ट काँकरभिट्टाको टोलीले नियन्त्रणमा लिएको सशस्त्र प्रहरी बल नेपाल बोडर आउट पोस्ट काँकरभिट्टा पोष्टपति सशस्त्र प्रहरी निरीक्षक प्रेम राईले बताउनुभयो ।
अबैधरुपमा नेपालतर्फ ठूलो परिमाणको आलु नेपालतर्फ आयात भईरहेको भन्ने गोप्य सूचनाका आधारमा मंगलबार साँझतिर ५ सय केजीका १ सय बोरा आलु नियन्त्रणमा लिईएको सशस्त्र प्रहरी निरीक्षक राईले बताउनुभयो । ट्याक्टर चालकले आफ्नो खेतबाट खनेर घर ल्याएको भने पनि त्यसमा सत्यता नरहेको दावी प्रहरीको छ ।
‘हरेक बोरामा ट्याक लगाइएको छ’ सशस्त्र प्रहरी निरीक्षक राईले भन्नुभयो— ‘सवै बोरामा ५० केजी तौलेर हालिएको छ, ट्याक लगाइएको छ , यसले पनि पुष्टि गर्छ खेतबाट किसानले खनेर घरमा ल्याएको नभई अबैधरुपमा आयात गरिएको भन्ने । ’
प्रहरीका अनुसार अहिले आलु लोड गरेको ट्याक्टरसशस्त्र प्रहरी बल नेपाल बोडर आउट पोस्ट काँकरभिट्टामा राखिएको छ । आवश्यक अनुसन्धान र प्रक्रिया पश्चात कारवाहीका लागि मेची भन्सार कार्यालय काँकरभिट्टा बुझाउने सशस्त्र प्रहरी निरीक्षक राईले बताउनुभयो ।
