१८ पुस, मेचीनगर : १ नम्बर प्रदेशका आन्तरिक मामिला तथा कानुन मन्त्री केदार कार्की आइतबार मेचीनगरका विभिन्न कार्यक्रममा व्यस्त रहनुभयो । नेपाली काँग्रेसका अगुवा कार्यकर्ता भेटघाट, होल्डिङ सेन्टर, मेची पुलमा रहेको हेल्प डेक्सको, निरीक्षणमा मन्त्री व्यस्त रहनुभएको हो ।
बिहान मेचीनगरमा आयोजित अगुवा कार्यकर्ताहरुसँगको भेटघाटका क्रममा मन्त्री कार्कीले संगठन विस्तारमा लाग्नुपर्ने र निर्वाचन नजिकिएका कारण बाँकी समय रचनात्म काममा खर्च गर्न सुझाव दिनुभयो । मन्त्री कार्किले पार्टीको १४ औं महाधिवेशनले नेपाली काँग्रेसका सबै नेता कार्यकर्ताहरुलाई एक भएर अघि बढ्न सन्देश दिएकाले सो अनुसार लाग्न समेत नेता कार्यकर्तालाई आग्रह गर्नुभयो ।
कार्यकर्ता भेटघाट सकिएपछि झापा जिल्लास्थित सुरक्षा निकायका प्रमुखहरुसँग समेत मन्त्री कार्कीले भद्रपुरमा छलफल गर्नुभयो । जिल्ला स्थित सुरक्षा समितिसँगको छलफलमा मन्त्री कार्कीले जिल्लाको शान्ति सुरक्षाको अवस्थाका बारेमा जानकारी लिनुभयो । सोही अवसरमा मन्त्री कार्कीले झापा जिल्ला कारगारको निरीक्षण पनि गर्नुभयो । मन्त्री कार्कीले झापा कारागारमा आयोजित मानवअधिकार प्रवद्र्घन तथा कानुनी सचेतना कार्यक्रमा समेत सहभागी भएर बन्दीहरुको समस्याका बारेमा जानकारी लिनुभयो । कार्यक्रम आन्तरिक मामिला तथा कानुन मन्त्रालयले आयोजना थियो ।
हेल्पडेक्सका बारेमा मेचीनगर नगरपालिका उपप्रमुख मीना पोखरेल उप्रेतीले मन्त्रीसहितको टोलीलाई जानकारी गराउनुभएको थियो । मेचीपुलको हेल्पडेक्स निरीक्षण पश्चात टोलीले झापाको मेचीनगर नगरपालिका–१४ ढुहागढीमा निर्माण हुदैं गरेको एक हजार क्षमताको होल्डिङ सेन्टरको निरीक्षण गरेको थियो ।
नगर उपप्रमख उप्रेतीले कोरोना भाइरसको संक्रमण रोकथाम तथा नियन्त्रणका लागि सरकारले पूर्वी नाका काँकरभिट्टाबाट नेपाल प्रवेश गर्ने नागरिकका लागि सो क्षमताको होल्डिङ सेन्टर निर्माण शुरु गरिएको मन्त्री कार्की सहितको टोलीलाई जानकारी गराउनुभयो ।
निरीक्षण पश्चात मन्त्री कार्कीले चाडै निर्माण सकेर हस्तान्तरणमा लाग्नुपर्नेमा जोड दिनुभयो । यसको व्यवस्थित गर्न र आवश्यक पूर्वाधार तयार गर्न समेत उहाँले सम्बन्धित पक्षलाई निर्देशन गर्नुभयो । यसका विषयमा तीनै तहको सरकारको भूमिका अपरिहार्य रहेकाले सबैले आ–आफ्नोक्षेत्रबाट सहयोग गर्नुपर्नेमा मन्त्री कार्कीले जोड दिनुभयो ।
पहिलो लहरमा नेपाली सेनाले आफैँ होल्डिङ सेन्टर निर्माण गरेको थियो, तर यस पटक सरकारले झापा सहित तराईका आठ वटा नाकामा सुविधायुक्त होल्डिङ सेन्टर निर्माण गर्न लागेको उहाँले बताउनुभयो ।
झापाका प्रमुख जिल्ला अधिकारी श्रवणकुमार तिमिल्सिनाको अध्यक्षतामा बसेको जिल्ला कोभिड–१९ व्यवस्थापन समिति ‘डीसीसीएमसी’को बैठकले हडिया खोला नजिकैको दक्षिणतर्फको खाली रहेको चार बिघा जमिनमा होल्डिङ सेन्टर निर्माण गर्ने निर्णय गरेको थियो ।
मेचीनगर नगरपालिकाको नाममा रहेको उक्त जमिन उपयुक्त देखिएको तथा मेचीनगर–१४ को सर्वपक्षीय भेलाले समेत त्यो जमिन सरकारले बनाउन लागेको होल्डिङ सेन्टरका लागि उपलब्ध गराउने निर्णयसमेत गरेको नगर उपप्रमुख उप्रेतीले बताउनुभयो ।
