सामुदायिक विद्यालयलाई म्याजिक भ्यान हस्तान्तरण, करीव एकसयबढी विद्यार्थी लाभावन्तित हुने अपेक्षा

३१ साउन, दुहागढी : मेचीनगर नगरपालिकाले यहाँको एउटा सामुदायिक विद्यालयलाई विद्यालय गाडी (म्याजिक भ्यान) हस्तान्तरण गरेको छ । मेचीनगर नगरपालिका —१४ स्थित दुहागढीमा रहेको जिल्लाकै नमूना श्री बालसुबोधिनी माध्यमिक विद्यालयलाई स्कुल म्याजिक भेन हस्तान्तरण गरिएको नगरपालिकाले जनाएको छ । बालसुबोधिनी हरेक दृष्टिकोणले विद्यार्थीदेखि अभिभावकासम्मको रोजाईमा पर्ने गरेको छ । जिल्लाभित्र र बाहिर थुप्रै विद्यार्थी शिक्षक अध्ययन अवलोकनका लागि आउने गरेका छन् ।

सामुदायिक विद्यालयमा विद्यार्थीको आकर्षण बढाउन मेचीनगर नगरपालिकाको नौ लाख र मेचीनगर नगरपालिका वडा नम्बर—१४ को १७ लाख ५० हजार गरी कुल २६ लाख ५० हजार रुपैयाँ लगानीमा म्याजिक भ्यान खरिद गरिएको प्रधानध्यापक विश्व थापाले जानकारी दिनुभयो ।

सामुदायिक विद्यालयमा विद्यार्थी टिकाइराख्न विद्यालयलाई स्कूल गाडी ‐म्याजिक भ्यान) हस्तान्तरण गर्ने योजना बमोजिम नगर प्रमुख गोपालचन्द्र बुढाथोकी, उपप्रमुख मीना पोखरेल उप्रेती, १४ नम्बर वडाका वडाध्यक्ष बाबुलाल सुब्बाले एक कार्यक्रमका बीच सवारी साधनको आवश्यक कागजात विद्यालय व्यवस्थापन समितिका अध्यक्ष शंकरलाल राजवंशी, सदस्य लोकेश्वर राजवंशी र प्रधानध्यापक विश्व थापालाई संयुक्तरुपमा हस्तान्तरण गर्नुभएको थियो ।

घर र विद्यालयको दूरी धेरै हुँदा विद्यालय पढ्न आउने विद्यार्थीलाई विद्यालय आवत जावतमा सहजताका लागि बस हस्तान्तरण गरिएको नगरपालिका प्रमुख गोपालचन्द्र बुढाथोकीले जानकारी दिनुभयो । ‘सामुदायिक विद्यालयहरुलाई सुविधासम्पन्न बनाई शैक्षिक गुणस्तर सुधार गर्न र विद्यार्थीलाई विद्यालयसम्म सहज पहुँचका लागि हाम्रो कामले महत्वपूर्ण भूमिका प्रदान गर्नेछ,’ नगरप्रमुख बुढाथोकीको भनाइ छ ।करीब छ सयभन्दा बढी विद्यार्थी अध्ययनरत सो विद्यालयमा झण्डै ५ देखि ७ किलो मिटरसम्मको दूरीबाट विद्यार्थी आउने गरेका छन् । वडा नम्बर १४ ‐साविक दुहागढीको १,६,९ र ८) मा सञ्चालन हुने म्याजिक भेनले तीनवटा वडा आसपास क्षेत्रसम्मका विद्यार्थीलाई समेट्ने छ । जसबाट एकसय बढी विद्यार्थी लाभावन्ति हुने उपप्रमुख मीना पोखरेल उप्रेतीले बताउनुभयो ।

विद्यार्थीलाई ओसारपसारका कार्यमा सहज बनाउने उद्वेश्य अनुरुप नगरपालिका र वडाले विद्यालयलाई सवारी साधन उपलब्ध गराएको उहाँले जानकारी दिनुभयो । कम विद्यार्थी संख्या भएका विद्यालयलाई मर्ज गरी एकिकृत विद्यालय बनाउने र दुरी अप्ठ्यारो भएका ठाउँमा यस्ता सवारी साधनले विद्यार्थी समट्ने विश्वास लिइएको छ । गुणस्तर शिक्षा निकाल्ने लक्ष्यका साथ विद्यालय अघि लाग्नुपर्ने उहाँको भनाई छ । उक्त सवारी साधनले टोल टोलमा पुगेर विद्यार्थी पिकअप गरी विद्यालयसम्म ल्याउने र विद्यालय समय समाप्त भएपछि घरसम्म पु¥याउनुपर्ने व्यवस्था गरेको छ । सामुदायिक विद्यालयमा अध्यनरत विद्यार्थीको वातावरणमा सहजरुपमा पढाई होस् भन्ने हेतुले पनि विद्यालयलाई सवारी साधन प्रदान गरिएको हो । सवारी साधनको मर्मत तथा सम्भारका लागि वडाबाट बजेट विनियोजन गरिएको वडाध्यक्ष बाबुलाल सुब्बाले जानकारी दिनुभयो । विभिन्नक्षेत्रमा कार्यरत मजदुरका छोराछोरीहरु अध्ययन गर्ने त्यस विद्यालयमा अहिले सिटी सफारी र टेम्पोमा विद्यार्थी आउने गरेका छन् । १५ देखि २० वटा त्यस्ता सवारी साधन प्रयोग भएका छन् ।

विद्यालयको शैक्षिक गुणस्तर वृद्धि गर्न, विद्यार्थीलाई सहजताका साथ विद्यालयमा आउने वातावरण बनाउन विद्यालयमा अनुदान दिने कार्यक्रम प्रभावकारी भएको विद्यालय व्यवस्थापन समितिका अध्यक्ष शंकरलाल राजवंशीले बताउनुभयो । राजवंशीको अध्यक्षतामा भएको कार्यक्रममा १४ नम्बर वडाका वडाध्यक्ष बाबुलाल सुब्बा, विद्यालय व्यवस्थापन समितिका सदस्य लोकेश्वर चौधरीलगायतले नगरपालिकाप्रति हार्दिक आभार व्यक्त गर्नुभयो । प्रधानध्यापक विश्व थापले सञ्चालन गरेको कार्यक्रममा विद्यालय विभिन्न समस्याका बारेमा स्थानीय सरकारलाई जानकारी गराईएको थियो ।