केही दिनको अविरल वर्षाले
अलिक तल
थुप्रै चीज बगाइ ल्याएछ
बगाइ ल्याएछ
ससना बच्चाका कोक्रा
निप्पल भएका बोतलहरु
जुत्ता,चप्पल,सिसाकलम,कापी किताबहरु,
बार्बी डल,खेलौना ,साइकल र बर्थ डे गीफ्टहरु
बगाइ ल्याएछ
बुढाबुढीका वैशाखीहरु
वृद्ध भत्ताका कागज पत्रहरु
भानुभक्त रामयणका पुस्तकहरु
पुराना फोटा एल्बम र नागरिकताहरु
बगाइ ल्याएछ
परदेशी माया मिसिएको चक्लेट,
मोबाइल र पर्फ्युमका बट्टाहरु,
केही थान फोटा फ्लेक्सहरु
मेनपावरका भिजीटिङ कार्डहरु,राहदानी
रेमिटान्सका राता पहेला बिलहरु
इपीएसका प्रवेश पत्र
थुप्रै शैक्षिक योग्यताका प्रमाण पत्रहरु
र सँगसँगै बगाइ ल्याएछ
थुप्रै पार्टीका झन्डा र घोषणा पत्रहरु
सबै घोषणा पत्रका
बुँदा नम्बर:२ मा यस्तो लेखिएको थियो
चाँडो भन्दा चाँडो तट्बन्धन निमार्ण गरि पक्की पुल बनाइने,सुकुम्बासी समस्याको हल गर्ने र दीर्घकालीन रोजगारी व्यवस्था मिलाइने छ
(सिएन गौतम इटहरी ,सुनसरी निवासी हुन् । उनले कविता र गैर आख्यानमा कलम चलाउदै आएका छन् ।)
