१ साउन, काँकरभिट्टा : झापाको मेचीनगरमा शनिबार विहान भएको सवारी दुघर्टनामा परी दुईजना घाइते भएका छन् । दुवैको स्वास्थ्य अवस्था सामान्य रहेको इलाका प्रहरी कार्यालय काँकरभिट्टाले जनाएको छ । प्रहरीका अनुसार पूर्व पश्चिम लोकमार्ग अन्तर्गत मेचीनगर—६ काँकरभिट्टा सडकखण्डमा करीव साढे ८ बजेतिर भएको सवारी दुघर्टनामा परी बाबुछोरा घाइते भएका हुन् ।
मेचीनगर—६, काँकरभिट्टास्थित मनिषा औषधि पसलछेउको साइडमार्ग हुदैं उत्तरबाट दक्षिणतर्फ आईरहेको प्र.१—०१—०१४ प १६३७ नम्बरको मोटरसाइकल र पश्चिमबाट पूर्वतर्फ आउदैं गरेको मे १ ख २४६६ नम्बरको यात्रुवाहक सगरमाथा यातायात कम्पनीको बस एक आपसमा ठोक्किदा दुघर्टना भएको काँकरभिट्टा प्रहरीको भनाई छ । मोटरसाइकल बसको अग्रभागमा छिरेको थियो । दुघर्टनामा परी मोटरसाइकलमा सवार मेचीनगर—६ काँकरभिट्टाका ६० वर्षीय यादवप्रसाद लुइटेल र ३२ वर्षीय प्रतापकुमार लुइटेल रहेका छन् । बसका चालकको होशियारी र कुशलताका कारण ठूलो क्षति हुन नपाएको प्रत्यक्षर्शीहरुको भनाई छ ।
घाइते दुवैको स्थानीय मनिषा पोलिक्लिनिक एण्ड डाइग्नोष्टिक सेन्टर प्रालिमा उपचार भएको र उपचार पश्चात घर फर्केको प्रहरीको भनाई छ । घटनाको वास्तविक कारण बुझ्न दुवै सवारी साधन इलाका प्रहरी कार्यालय काँकरभिट्टाले नियन्त्रणमा लिइएको छ । मोटरसाइकल भरखर खरिद गरेकाले पूजाआजाका लागि श्री पाउ पाथीभरा चारआली हिडेको र बस ग्यारेजबाट काँकरभिट्टा टर्मिनलतर्फ आइरहेको प्रहरीको भनाई छ ।
