२० साउन, काठमाडौँ : सत्ता गठबन्धन दलले प्रतिनिधि सभा र प्रदेश सभा निर्वाचनमा सिट बाँडफाँटका लागि कार्यदल गठन गरेको छ । शुक्रबार बालुवाटारमा बसेको गठबन्धनको बैठकले चुनावी तालमेलका लागि सिट बाँडफाँट गर्न ११ सदस्यीय कार्यदल गठन गरेको हो ।
कार्यदलमा नेपाली कांग्रेसबाट तीन जना, माओवादी केन्द्र, एकीकृत समाजवादी, जनता समाजवादी र राष्ट्रिय जनमोर्चाबाट दुई-दुई जना सदस्य रहेका छन् ।
कार्यदलमा कांग्रेसबाट महामन्त्री गगन थापा, कृष्ण सिटौला र ज्ञानेन्द्रबहादुर कार्की रहेका छन् । त्यस्तै नेकपा माओवादी केन्द्रबाट वर्षमान पुन र जनार्दन शर्मा रहेका छन् ।
नेकपा (एकीकृत समाजवादी)बाट महासचिव बेदुराम भुसाल र प्रमेश हमाल रहेका छन् भने जनता समाजवादी पार्टी (जसपा)बाट रामसहायप्रसाद यादव र रकम चेम्जोङ सदस्य छन् ।
त्यस्तै राष्ट्रिय जनमोर्चाबाट हिमलाल पुरी र आनन्द शर्मा सदस्य रहेका छन् । कार्यदललाई साउन मसान्तभित्र सबै निर्वाचन क्षेत्रको अवस्था विश्लेषण गरी सीट बाँडफाटको मोडालिटीसहितको सुझाव पेश गर्न निर्देशन दिइएको छ।
