बिर्तामोड । झापाको बिर्तामोड ४ लिटलफ्लावर बोर्डिङ स्कूल अघिल्तिरको एउटा अटो ग्यारेजमा आज साँझ आगलागी भएको छ ।
आगलागीको यकिन कारण खुल्न सकेको छैन तर विद्युत् सर्ट भएर आगो लागेको स्थानीयको अनुमान छ । साँझ ८ बजेतिर आगो दन्किए पछि स्थानीयले प्रहरी र दमकललाई खबर गरेका थिए । उमेश साहले सञ्चालन गर्दै आएको अटो ग्यारेजमा आगलागी भएको इलाका प्रहरी कार्यालय अनारमनीले जनाएको छ ।
अहिले आगो नियन्त्रणको प्रयास भइरहेको छ । आगलागी नियन्त्रणका लागि बिर्तामोड, भद्रपुर, मेचीनगर गरी चार वारुणयन्त्र पुगेको छ ।
इलाका प्रहरी कार्यालयका प्रमुख प्रहरी नायव उपरीक्षक मुकुन्द रिजालका अनुसार अटो ग्यारेजमा आगलागी हुँदा नयाँ तथा मर्मतका लागि ल्याएका अटोहरु जलेर नस्ट भएका छन् । क्षतिको यकिन तथ्याङ्क विवरण आउन बाँकी छ । बिर्तामोड नगरपालिकाको सहित चारवटा वरुणयन्त्र, प्रहरी र स्थानीयको सहयोगमा भरखरै आगलागी नियन्त्रणमा लिएको छ ।
