२३ माघ मेचीनगर : ज्येष्ठ नागरिक वडा समिति मेचीनगर- ६ ले साेमबार दुई जाेडी सासु बुहारीलाई उत्कृष्ट सासु बुहारी सम्मान गरेकाे छ । प्रमुख अतिथि मेचीनगर नगरपालिका उपप्रमुख मीना पाेखरेल उप्रेतीले बुहारी रेणु सुब्बा तिवारी तथा सासु ९१ वर्षीय रन्धता तिवारी र बुहारी मृदुला केरूङ् तथा सासु सरस्वती केरूङ्लाई सम्मान गर्नुभएकाे थियाे ।
उहाँहरूलाई सासुले बुहारीलाई छाेरी समान र बुहारीले सासुलाई आमाकाे भूमिकामा राखेकाे भन्दै सम्मान गरिएकाे हाे । कार्यक्रममा बाेल्दै प्रमुख अतिथि उपप्रमुख उप्रेतीले समाजमा सासु बुहारीबीचकाे सम्बन्धलाई हेर्ने दृष्टिकोणमा फरक ल्याउनुपर्नेमा जाेड दिनुभयाे । अब सासु हाेईन आमा र बुहारी नभई छाेरीकाे सम्बन्ध कायम गर्नुपर्ने उहाँले बताउँनुभयाे ।
ज्येष्ठ नागरिक समिति मेचीनगरले शुरू गरेकाे याे अभियानले अन्य सासु बुहारीमा समेत सम्बन्ध सुधार विस्तार हुनेमा विश्वास व्यक्त गर्नुभयाे । समितिले १ नम्वर ईकाइबाट याे अभियान शुरू गरेकाे र नगरका दशवटै ईकाइमा अभियान क्रमस अघि बढाउने समितिले जनाएकाे छ ।
समितिका नगर अध्यक्ष नारायण प्रसाईकाे सभापतित्वमा भएकाे कार्यक्रममा विशिष्ट अतिथि मेचीनगर वडानम्वर- ६ का वडाध्यक्ष ललितबहादुर तामाङ, विशेष अतिथि हिम्मत क्षेत्री, सुन्दरी श्रेष्ठ मुक्ति श्रेष्ठलगायतले बाेल्नुभएकाे थियाे । उहाँहरूले कुनै सासुले आफु पनि कसैकाे छाेरी, बुहारी हुदैँ सासु र बुहारीले कसैकाे छाेरी भएर बुहारी हुदैँ सासु हुने कुरा विर्सनु नहुने बताउनुभयाे । सासु र बुहारीबीचकाे सम्बन्ध आमा छाेरी सरह भए त्याे घर असल र सभ्य हुने उहाँहरूकाे भनाई थियाे । नगर सचिव प्रल्हाद श्रेष्ठले कार्यक्रमकाे सञ्चालन गर्नुभएकाे थियाे ।
