नेपाल सरकार शिक्षा विज्ञान तथा प्रविधि मन्त्रालयले जारी गरेको विद्यालय सञ्चालन कार्यढाँचा २०७७ अन्तर्गत मेचीनगरका संस्थागत एवम् सामुदयिक अधिकांश विद्यालयहरुले स्वास्थ्य मापदण्ड अपनाएर आजबाट विद्यालय सञ्चालन गरेका छन् ।
यस बारेमा मेचीनगर शिक्षा शाखा प्रमुख एवं उपसचिव होमनाथ भण्डारी बताउनु हुन्छ –‘विद्यालयहरु सञ्चालनमा आएपछि अभिभावक, विद्यार्थी एवम् शिक्षकहरुमा उत्साह जागेको छ । विद्यालयले तोकिएको मापदण्ड पूरा गरे नगरेको बारे अब केहि दिनमै अनुगमन हुनेछ ।’ वहाँले भन्नु भयो–‘एकहप्ता भित्र सम्पूर्ण विद्यालयहरु पूर्णरुमा सञ्चालनमा आउँने र त्यसको प्रभावकारीता समेत थाहा पाइनेछ ।’
के भन्छन् सरोकारवालाहरु :
आजबाट हामीले स्वास्थ्य मापदण्ड पूरा गरी विद्यालय सञ्चालनमा ल्याएका छौं । आज हाम्रो विद्यालयमा ८० प्रतिशत विद्यार्थीहरु उपस्थित भएको र बाँकी रहेका विद्यार्थी सामुदायिक विद्यालयमा गएका वा दैनिक रोजी रोटीका लागि काम गर्ने अभिमावकहरुका नानीहरु रहेको हुँदा उपस्थित हुन नसकेको भन्ने हामीलाई लागेको छ । — किरन अधिकारी, प्रिन्सिपल अंशु एकाडेमी बाहुण्डाँगी
निजी विद्यालयहरु आइतबारबाट सञ्चालन भएपनि हामी सोमबारबाट आलो पालो पद्धती अपनाएर विद्यालय सञ्चालन गर्नेछौं । हामी हप्तामा २ दिन पालो पर्ने गरी करिब आफ्ना १२०० विद्यार्थीहरुको पठन पाठनको प्रबन्ध गर्ने छौं यसका लागि हामीले नगर शिक्षा कार्यालयमा प्रस्ताव समेत पेश गरेका छौं । साथै सुरुका दिनमा विद्यार्थीहरुलाई स्वास्थ्य सम्बन्धि जनचेताना र मनोपरामर्श समेत प्रदान गरिने छ । –कृष्ण पुरी, प्रधानाध्यापक आदर्श मा.वि., इटाभट्टा
सञ्चालक समितिको निर्देशन, अभिभावकसँँगको छलफल र जनप्रतिनिधिहरुको परामर्श अनुसार साना कक्षाहरु बाहेकका कक्षा ३ देखि १० सम्मका मात्र विद्यार्थीहरुको पठन पाठन गराइने र साना कक्षाहरु प्रभावकारीताको आधारमा स्वास्थ्य मापदण्ड पुरा गरेर सञ्चालन गर्ने योजनामा छौं । –नवराज सुवेदी, सहायक प्रिन्सिपल, सिताराम सामुदायिक अंग्रेजी विद्यालय, धाइजन
विद्यालयले कम्तिमा ३ वटा सिफ्टमा कक्षाहरु सञ्चालन गर्नुपर्ने र मास्क, सेनिटाइजर, हातधुने साबुन पानीको व्यवस्था गर्नुपर्ने र विद्यालयहरुले यी सबै कुराहरु गरे नगरेको भनेर अभिभावक सहित सरोकारवाला सबैले अनुगमन गर्नुपछ । कोरोनासँग भागेर होइन जुधेर यसलाई पराजित गर्नुपर्छ । म आफै पनि कोरोना संक्रमित भई दुईपटक सम्म पोजेटिभ आएर निको भएको हुँदा सुरक्षा सतर्कता अपनाउँदा यसबाट बच्न सकिने र हाम्रा दैनिकीहरु सञ्चालन गर्न सकिन्छ । –राजकुमार पराजुली, अभिभावक, काँकरभिट्टा
जतिखेर अनलाइन कक्षा चलेको थियो त्यती खेर पढ्दा भन्दा अहिले कक्षामा बसेर पढ्दा धेरै राम्रो लागेको छ । हामीले गुरुगुरुआमाहरुले पढाउनु भएको विषय अझ राम्ररी बुझ्न पाएका छौं । मास्क, सेनिटाइजर, बारम्बार हात धुने, अनि थर्मल गनबाट शरीरको तापक्रम समेत जाँच हुने गरेता पनि मनमा अलि अलि डर पनि छ र सामाजिक दुरी कायम गर्न नसकिएला कि भन्ने पनि लाग्छ । तर पनि विद्यालयले हामीलाई कक्षामा सुरक्षित तरिकाले पठनपाठनको सम्पूर्ण व्यवस्था गरिदिएको कारण केही ढुक्क छौं । –विद्यार्थीद्वय प्रिती खवास र आर्यन गुरुङ्ग, अरुणोदय आवासीय मा.वि., काँकरभिट्टा
