७ पौंष, काठमाडौँ : गठबन्धनको दोस्रो ठूलो घटक नेकपा माओवादी केन्द्रका अध्यक्ष पुष्पकमल दाहाल प्रचण्डले पहिलो चरणको प्रधानमन्त्री नपाए कांग्रेससँगको यात्रा अहिलेलाई टुंगिने संकेत शेरबहादुर देउवाले बुझ्नेगरी दिएका छन् ।
एमाले अध्यक्ष केपी शर्मा ओलीसँग वुधबार शीतल निवास र बिहीबार संसद भवनमा देखिएको हार्दिक र बडी ल्याङ्ग्वेजको पछाडि केही नेताको लबिङले काम गरिरहेको उच्च स्रोतले जनाएको छ ।
चीनबाट फर्किएलगत्तै माओवादी केन्द्रका उपमहासचिव तथा पार्टीभित्र निर्णायक हैसियत राख्ने नेता वर्षमान पुनले एमालेसँग मिलेर सरकार गठन गर्ने र प्रचण्डलाई प्रधानमन्त्री बनाउने प्रयास थालेका छन् ।
एमालेका नेताहरुसँग पुनले यसअघि नै कम्युनिष्टहरु फेरि मिल्नुको विकल्प नरहेको भन्दै आएका थिए । पुन चीनबाट फर्किएलगत्तै एमाले र माओवादीसहितको सरकार बन्न सक्ने सम्भावनाले एकाएक राजनीतिमा चर्चा पाएको छ ।
चीनले नेपालमा एमाले र माओवादी मिलेर सरकार बनाऊन् भन्ने चाहना राख्नु नयाँ होइन । यसपटक वर्षमान पुनले चिनियाँ उच्च अधिकारीहरुसँग भेटेको आधिकारिक जानकारी दुवैतिरबाट सार्वजनिक गरिएको पनि छैन । तर, यसै साता चिनियाँहरुको एउटा टोली काठमाडौंसमेत आएको थियो ।
नेपाल अहिले भूराजनीतिक रुपले संवेदनशील ठाउँमा छ । ‘इण्डो अमेरिकन’ लबी यही गठबन्धनको सरकार कायम राख्न सक्रिय भइरहेका वेला प्रचण्डलाई कांग्रेससँगको सहकार्यबाट बाहिर निकाल्न माओवादी केन्द्रकै प्रभावशाली नेताहरु लागिपरेका छन् ।
कांग्रेसले पहिलो चरणको प्रधानमन्त्री माओवादीलाई दिन चाहेको छैन र राष्ट्रपति पनि दिन मानिरहेको छैन । प्रचण्डले पहिलो चरणमै प्रधानमन्त्री पाएर सम्मानजनक शक्ति बाँडफाँट नभए गठबन्धनको यात्रा यही टुंगिने प्रस्ट सन्देश देउवालाई दिएको निकट नेताहरुले बताएका छन् ।
वर्षमानसँगै छलफलमा रहेका अर्का एक नेताले भने, ‘हामी भूराजनीतिक संकटमा फस्दैछौं र माओवादी ठूलो संकटमा छ । अब कोर्स करेक्सन गर्नुपर्छ र एमालेसँग मिलेर प्रचण्ड प्रधानमन्त्री बन्ने अनि एमालेले राष्ट्रपति तथा सभामुख लिएर जानुपर्छ भन्ने कुरा भएको छ । प्रचण्ड एकप्रकारले कन्भिन्स हुनुहुन्छ ।’
कांग्रेसको चुनावी गठबन्धनबाट माओवादीले फाइदा लिन नसकेको र माओवादीको भोटले कांग्रेसले धेरै ठाउँ जितेको निष्कर्ष नेताहरुको छ । वर्षमानसहित माओवादीका केही प्रभावशाली नेतालाई निर्णायक पहल गरेर प्रचण्डलाई बाहिर निकाल्न जिम्मा दिइएको एक स्थायी कमिटी सदस्यले बताए ।
‘हाम्रो भोटले उनीहरु जितेर पहिलो पार्टी भए । तर, हामीलाई खासै फाइदा भएन । यो यात्रा जारी राख्दा माओवादी पार्टी अर्को चुनावसम्म निर्णायक हैसियतमा रहँदैन’, उनले भने ।
पुनले औपचारिक रुपमा अहिलेसम्म सत्ता समीकरणबारे कुनै प्रतिक्रिया दिएका छैनन् । तर, कांग्रेससँगको सहकार्यबाट माओवादी निरन्तर ओरालोमात्र लाग्ने उनले निकटस्थहरुलाई बताएका छन् ।
प्रचण्डलाई एमालेको समर्थनमा पहिलो चरणको प्रधानमन्त्री बनाउँदा उनको चाहना पूरा हुने र विस्तारै एमालेसँग पुनः पार्टी मिलाएर कोर्स करेक्सन गर्न सकिने अधिकांश माओवादी नेताहरूकाे विश्वास छ । प्रचण्डको व्यवस्थापन हुनासाथ पार्टी मिल्न गाह्रो नहुने नेताहरुको बुझाइ छ ।
बिहीबार साँझ माधव नेपालसहित बालुवाटारमा देउवा र प्रचण्डको छलफल भएको छ । यसमा के के कुरा भए भन्ने आइसकेको छैन । तर, वर्षमाननिकट स्रोतले भने प्रचण्डले आफ्नो बटमलाइन देउवालाई सुनाएका छन् । देउवा प्रचण्डको बटमलाइनबाट अप्ठेरोमा परेका छन् ।
माओवादीको जिल्ला तहदेखिकै पंक्ति कांग्रेससँगको चुनावी गठबन्धनबाट सन्तुष्ट हुन सकेको छैन । त्यो दबाब वर्षमानसहितका नेताहरूमार्फत प्रचण्डमा परेको बताइन्छ । यसको नतिजा राष्ट्रपतिले दिएको समयसीमा पुस १० भित्र देखिने नेताहरु बताउँछन् ।
एमाले र माओवादी मिल्नासाथ राप्रपा तथा जसपासहित लगभग बहुमत पुग्छ । नेकपा एस कांग्रेससँगै रहे पनि अन्य साना दल र स्वतन्त्र मिलाएर सुविधाजनक बहुमतको सरकार बनाउने अवस्था रहेको र राष्ट्रिय स्वतन्त्र पार्टीसमेत सकारात्मक रहेको नेताहरुले बताएका छन् ।
एमाले अध्यक्ष केपी ओलीले प्रचण्डलाई सामान्य संकेत गरिसकेका छन् । उपाध्यक्ष विष्णु पौडेल, सुवास नेम्वाङदेखि पृथ्वीसुब्बा गुरुङ र योगेश भट्टराईसम्मका नेताहरुले माओवादीलाई गठबन्धनबाट बाहिर आएर सहकार्य थाल्न गरेको आग्रहबारे पनि ओली जानकार छन् ।
तर, प्रचण्डले पहिले गठबन्धन छाडेको घोषणा गरेपछिमात्र अरु कुरा हुने एमाले नेताहरु बताउँछन् । एमालेको बिहीबार बसेको सचिवालय बैठकले विशेष निर्णय गर्ने एकल अधिकार पनि अध्यक्ष तथा संसदीय दलको नेता ओलीलाई दिएको छ ।
नेपालप्रेसबाट
