नेपाली कांग्रेसका महामन्त्रीद्वय गगन थापा र विश्वप्रकाश शर्माले आगामी २१ फागुनमा हुने आम निर्वाचनलाई लक्षित गर्दै नयाँ मतदाता नामावली सूचीकृत गर्नका लागि ‘मतदाता दर्ता समूह’ गठन गरेर अभियान चलाउन पार्टी संगठनहरूलाई परिपत्र जारी गरेका छन्।
निर्वाचन आयोगले कात्तिक ३० गतेसम्म मतदाता नामावलीमा नाम दर्ता गर्ने समय तोकेको सन्दर्भमा महामन्त्रीद्वयले पार्टी संरचनालाई छठ पर्व लगत्तै नयाँ मतदाता दर्ता अभियान चलाउन वडा कमिटीसम्मलाई निर्देशन दिएका हुन्।
परिपत्रमा पार्टी संरचनाहरूलाई विशेष गरी युवा उमेर समूहसँग छलफल गर्न र ती युवा समूहबाटै प्रतिनिधि खटाएर मतदाता दर्ता समूह गठन गर्न भनिएको छ। उनीहरूले यस अभियानमा परिचालन हुनका लागि माथिल्लो तहका कमिटीले तल्लो तहका कमिटीसँग समन्वय गरी वातावरण बनाउन पनि निर्देशन दिएका छन्।
महामन्त्रीद्वयको यो सक्रियतालाई देशमा भएको जेन–जी आन्दोलनपछि मतदाता सूचीमा नाम दर्ता गराउने नयाँ पुस्ताका मतदाताहरूमा बढेको आकर्षणलाई आफ्नो पक्षमा आकर्षित गर्ने संकेतका रूपमा हेरिएको छ। महामन्त्री थापाले यसअघिदेखि नै नवपुस्ताका मतदातालाई आकर्षित गर्नुपर्ने बताउँदै आएकोमा जेन–जी आन्दोलनपछि आन्दोलनमा सहभागी युवाहरूलाई आफ्नो पंक्तिमा ल्याउन विशेष पहल गरिरहेका छन्।
