३ साउन, मेचीनगर : राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देन शनिबार झापाका दुईवटा अलग अलग कार्यक्रममा सहभागी भए । गृह जिल्ला झापाको मेचीनगरमा ५ औं मेचीनगर नगर कार्य समितिको नगर अधिवेशन र झापाको निर्वाचन क्षेत्र नम्बर ३ प्रादेशकि निर्वाचन क्षेत्र क र ख को अधिवेशनमा अध्यक्ष लिङ्देन सहभागी भएका हुन् । २०७९ सालको निर्वाचनमा उनी यही क्षेत्रबाट प्रतिनिधि सभाको सदस्यमा निर्वाचित भएका थिए ।
मेचीनगर —१० स्थित पासाङ्ग ल्हामू स्मृति जेसिज भवनमा नगर समितिको अधिवेशन उद्घाटनका प्रमुख अतिथि समेत रहेका प्रतिनिधि सभा सदस्य लिङ्देनले पार्टीभित्र षडयन्त्र गर्नेहरूले ‘बाटो तताउन’ चेतावनी दिए । केही दिन अघि पार्टीका चार नेताले उनीविरुद्ध निकालेको प्रेस विज्ञप्तिप्रति लक्षित गदैं उनले यस्तो चेतावनी दिएका हुन् । अध्यक्ष लिङ्देनले पार्टीका केही नेताहरुलाई अनुशासनको कारवाही गरे पछि पार्टीमा विवाद चुलिएको छ ।
वरिष्ठ उपाध्यक्ष विक्रम पाण्डे, उपाध्यक्ष मुकुन्दश्याम गिरी, महामन्त्रीद्वय डा. धवलशमसेर राणा र कुन्ती शाहीले विज्ञप्ति निकालेर अध्यक्ष लिङ्देनका कारणले पार्टीमा अपूरणीय क्षति पुगेको आरोप लगाएको मसी सुक्न नपाउँदैं झापा आएर लिङ्देनले विचार मिल्ने भए र पार्टीको नेतृत्व चाहने भए आगामी महाधिवेशनसम्म पर्खन नभए अर्कै बाटो लिएर जान कडा चेतावनी दिएपछि कार्यक्रम स्थलमा सहभागीहरुले गडगडावट तालीले नेता लिङ्देनको भनाईको समर्थन गरे ।
‘विचार मिल्छ तर राजेन्द्र लिङ्देन मन परेन भने महाधिवेशन पर्खनुपर्छ। तर विचार नै मिलेन भने चाहिँ बाटो तताउनु पर्छ।’ उनले थपे । अध्यक्ष लिङ्देनले पार्टीको अनुशासन र विधिमा नबस्नेहरुका लागि बाटो खसला रहेको र बाटो लाग्दा हुने विचार राखे । राप्रपा मात्र एक यस्तो पार्टी हो, जसले अख्तियार दुरुपयोग अनुसन्धान आयोगमा गएर भ्रष्टाचारविरुद्ध ज्ञापनपत्र बुझाएर यसका विरुद्ध औँला उठाएको छ,’ लिङ्देनले भने ।
नगर अधिवेशनको उद्घाटन सत्रमा पार्टीकी केन्द्रीय सदस्यहरु खुश्बु ओली, नरेन्द्रकुमार खड्का, धर्म साँस्कृतिक संगठन कोशी प्रदेशका अध्यक्ष ध्रुबकुमार शिवाकोटी, झापा अध्यक्ष केशवकुमार ओझा लगायतले शुभकामना मन्तव्य व्यक्त गरेका थिए ।
कार्यक्रममा विभिन्न पार्टी परित्याग गरेर राप्रपामा प्रवेश गरेकाहरुलाई खादा, अविर र टीका लगाएर स्वागत गरिएको थियो । त्यस्तै विभिन्न समयमा पार्टीलाई योगदान गर्नेहरु सम्मानित भएका छन् । यसरी सम्मानित हुनेहरुमा पार्टीका संस्थापक स्वर्गीय मीनबहादुर खड्काकी श्रीमती जानुका खड्का, जमुनादेवी काफ्ले, कुवेरमान राई, बीरबहादुर कटुवाल, रुक्मणि चौलागाईँ, नारायण न्यौपाने, पदमबहादुर कटुवाल, इन्द्रमणि प्रसाई र सूर्यबहादुर राई छन् ।
राप्रपा मेचीनगरकी अध्यक्ष एवम् कोशी प्रदेश सभा सदस्य सविना बजगाईले अध्यक्षतासहित चारवर्षे कार्यकालमा गरेका प्रगति प्रतिवेदन प्रस्तुत गरेकी थिइन् । राप्रपा नेता अशोक सुब्बाले स्वागत गरेको कार्यक्रमको सञ्चालन सचिव विशालकृष्ण बाँस्तोलाले गरेका थिए ।
अध्यक्षमा चन्द्र निरौला
अधिवेशनले आगामी चार वर्षे कार्यकालका लागि नयाँ नेतृत्व समेत चयन गरेको छ । राष्ट्रिय प्रजातन्त्र पार्टी(राप्रपा) मेचीनगरको पाँचौँ नगर अधिवेशनले अध्यक्षमा चन्द्र निरौलालाई सर्वसम्मत चयन गरेको छ । निरौला यसअघि दुई पटक पार्टीको नगर सचिव भइसकेका छन् । निरौलाको अध्यक्षतामा २१ सदस्यीय नयाँ समिति चयन भएको हो ।
जसको सदस्यहरुमा सूर्यबहादुर राई, राजननाथ वेडारी, कृष्णबहादुर खड्का, चन्द्रप्रसाद सुवेदी, पर्शुराम पराजुली, गिरीराज पौडेल, शारदा पराजुली, मनिता गिरी, धनमाया गौतम, अस्मिता खरेल, सन्तोष भट्टराई रहेका छन् ।
त्यस्तै होमनाथ बराल, भक्तिप्रसाद गडतौला, लक्ष्मणकुमार लिम्बु, देवीमाया शिवाकोटी, बासुदेव उप्रेती, कुसुम कटुवाल, गोविन्द न्यौपाने, खड्ग श्रेष्ठ र ईन्द्रबहादुर थापा सदस्यमा चयन भएका छन् ।
निर्वाचित समितिको नाम निर्वाचन समिति संयोजक टंक कटुवालले घोषणा गरेका थिए । समितिलाई पार्टीका अध्यक्ष राजेन्द्र लिङ्देन, केन्द्रीय सदस्यहरु खुश्बु ओली, नरेन्द्रकुमार खड्का, नगर अध्यक्ष सविना बजगाई लगायतले खादा, टीका र अविर लगाएर कार्यकाल सफलताको शुभकामनासहित बधाई ज्ञापन गरेका थिए ।
अध्यक्ष बजगाईले निरौलालाई माइन्यूट हस्तान्तरण पनि गरेकी थिइन् । कार्यक्रममा नवनिर्वाचित अध्यक्ष निरौलाले प्रतिवद्वता मन्तव्य व्यक्त गरेका थिए ।
