२८ मंसिर, मेचीनगर : झापाको मेचीनगरमा भइरहेको अन्तर मा.वि. फूटबलको क्वाटर फाइनलमा काँकरभिट्टा मा.वि. र इष्ट होराइजन मा.वि. धुलाबारी सेमी फाइनलमा प्रवेश गरेका छन् । काँकरभिट्टा फूटबल ट्रेनिङ्ग सेन्टरको आयोजनामा भइरहेका मेचीनगर स्तरीय अन्तर मा.वि. फूटबलको आज भएको खेलमा काँकरभिट्टा मा.वि.ले विद्या विकास एकाडेमी बाहुण्डाँगीलाई २–० गोल अन्तरले पाखा लगाउँदै सेमी फाइनलमा ठाउँ पक्का गरेको छ ।
काँकरभिट्टा मा.वि.का लागि खेलको १४ औं मिनटमा प्रनिश राईले गोल गर्दै अग्रता दिलाएका थिए भने खेलको ३९ औं मिनेटमा काँकरभिट्टाकै विनय दनुवारले थप १ गोल गर्दै अग्रतालाई दोब्बर पार्न सफल भएका थिए ।
खेलको म्यान अफ दि म्याच काँकरभिट्टा मा.वि.का विनय दनुवारलाई प्रदान गरिएको काँकरभिट्टा फूटबल ट्रेनिङ्ग सेन्टरका महासचिव लाक्पा तामाङ्गले बताए ।
त्यस्तै आजै भएको दोस्रो क्वाटर फाइनल खेल इष्ट होराइजन धुलाबारी र अंशु एकाडेमी बाहुण्डाँगी बीच भएको थियो । खेलको निर्धारित समयावधिमा दुबै टिमबाट गोल हुन नसके पछि पेनाल्टी सुट आउटमा इष्ट होराइजन धुलाबारीले अंशु एकाडेमी बाहुण्डाँगीलाई ५–३ गोल अन्तरले हराएर सेमी फाइनल प्रवेश गरेको छ । दोस्रो खेलको म्यान अफ दि म्याच इष्ट होराइजनका गोल किप्पर दिप्सन खनाललाई प्रदान गरिएको छ ।
भोलिको खेल धुलाबारी मा.वि. र जनता मा.वि. तेलपानी बीच हुने आयोजक समितिका अध्यक्ष मिनबहादुर वस्नेतले बताए ।
यही पौष ५ गते सम्म सञ्चालन हुने खेलमा मेचीनगरका १२ वटा टिमले सहभागिता जनाएका छन् । विजेता टिमले नगद रु. २० हजार र उपविजेत टिमले नगद रु. १० हजार – प्राप्त गर्नेछन् भने सर्वोत्कृष्ट खेलाडीले नगद रु.३ हजार, सर्वाधिक गोलकर्ता खेलाडीले रु.२ हजार ५ सय, उत्कृष्ट गोल रक्षक खेलाडीले नगद रु. २ हजार, उदयीमान खेलाडीले नगद रु. १ हजार ५ सय र फाइनल खेलको म्यान अफ दि म्याचले नगद रु. १ हजार प्राप्त गर्ने काँकरभिट्टा फूटबल ट्रेनिङ्ग सेन्टरका अध्यक्ष मिनबहादुर वस्नेतले मेरो मेचीनगरलाई बताउनु भयो ।
