२४ फागुन, मेचीनगर : झापा जिल्लाको काँकरभिट्टामा पाँचौं संस्करणको मेचीनगर गोल्डकप प्रतियोगिता फागुन २४ गते शनिबारदेखि सुरु हुँदैछ। प्रतियोगिताको सम्पूर्ण तयारी पूरा भइसकेको मेचीनगर गोल्डकप मूल आयोजक समितिका संयोजक श्रीप्रसाद मैनालीले प्रतियोगिताको तयारी पूरा भइसकेको जानकारी गराउँदै अब खेल सुरु हुने मात्र बाँकी रहेको बताए।
गोल्डकप सम्पन्न गर्न करिब एक करोड रुपैयाँ खर्च लाग्ने अनुमान गरिएको छ। आयोजक समितिका सहसंयोजक एवं आर्थिक समिति संयोजक विमल आचार्यका अनुसार खर्च व्यवस्थापनको लागि स्थानीय स्रोत साधनबाट सहयोग प्राप्त भइरहेको छ। उनले कसैलाई जबरजस्ती सहयोग मागिएको नभई स्वेच्छिक रुपमा सहयोग प्राप्त भएको बताए।
पत्रकार सम्मेलनमा आयोजक काँकरभिट्टा फुटबल ट्रेनिङ सेन्टरका अध्यक्ष नवराज ओली, झापा जिल्ला फुटबल संघका अध्यक्ष भगिरथ आले, जिल्ला खेलकुद विकास समितिका पूर्व अध्यक्ष शंकर थापा, पूर्व अध्यक्ष बालाजित राई, प्राज्ञ सुभद्रा अर्याललगायत फुटबल प्रेमीहरूको उपस्थिति थियो। पत्रकार सम्मेलनको सहजीकरण मूल आयोजक समितिका सचिव राजु कार्कीले गरेका थिए।
प्रतियोगिता अन्तर्गत आज हुने उद्घाटन खेल आयोजक काँकरभिट्टा फुटबल क्लब र भारतको जर्जियन फुटबल क्लबबीच हुनेछ। उद्घाटनको दिन अन्तर्राष्ट्रिय नारी दिवस परेकाले महिलाहरूलाई निःशुल्क प्रवेशको व्यवस्था गरिएको छ। फाइनल बाहेकका खेलहरूको टिकट दर एक सय रुपैयाँ तोकिएको छ।
गोल्डकपको दोस्रो खेल फागुन २५ गते चर्च ब्वाइज युनाइटेड ललितपुर र झापा एफसीबीच हुनेछ भने फागुन २६ गते उज्बेकिस्तानको ब्ल्याक बुल्स र धरान एफसी भिड्नेछन्। फागुन २७ गते एपिएफ क्लब र मच्छिन्द्र क्लबबीच प्रतिस्पर्धा हुनेछ।
नकआउट प्रणालीमा खेलाइने प्रतियोगिताको पहिलो सेमिफाइनल खेल फागुन २८ गते हुनेछ भने दोस्रो सेमिफाइनल खेल फागुन २९ गते हुनेछ। प्रतियोगिताको फाइनल खेल चैत २ गते हुनेछ।
प्रतियोगिताको प्रत्येक खेलमा ‘प्लेयर अफ द म्याच’ घोषित हुने खेलाडीलाई नगद ११ हजार र ट्रफी प्रदान गरिनेछ। खेल मैदानमा दर्शकहरूको सुविधाका लागि ६ हजार क्षमताको प्यारापिट निर्माण गरिएको छ।
प्रतियोगिताको सफलताका लागि स्थानीयवासी, राजनीतिक दल, व्यवसायी, खेल प्रेमी सबैको सकारात्मक सहभागिता रहेको आयोजकले जनाएको छ। मेचीनगर गोल्डकप झापाका अन्य गोल्डकपहरू भन्दा ठूलो तथा प्रतिष्ठित प्रतियोगिताको रूपमा स्थापित हुँदै गएको आयोजकहरू बताउँछन्।
