झापा, मेचीनगर : मेचीनगर गोल्डकप फुटबल प्रतियोगिताको अन्तिम क्वाटरफाइनल खेलमा मच्छिन्द्र फुटबल क्लबले एपीएफलाई १–० को संघर्षपूर्ण जित निकाल्दै सेमिफाइनल यात्रा तय गरेको छ। मंगलवार सम्पन्न खेलसँगै प्रतियोगिताको सेमिफाइनल समीकरण पूरा भएको छ।
मच्छिन्द्रको जितका लागि निर्णायक गोल विदेशी खेलाडी युसुफ मलिकले पहिलो हाफको अतिरिक्त समयमा गरे। स्टेफन कामाहाको पासमा उनले पेनाल्टी क्षेत्रबाट गरेको प्रहारले जाली चुमेको थियो। मच्छिन्द्रले अब दोस्रो सेमिफाइनल खेलमा चर्च व्वाइज युनाइटेडको सामना गर्नेछ।
दोस्रो हाफमा पनि मच्छिन्द्रले बल पोजिसन आफ्नो पक्षमा राखे पनि थप गोल गर्न सकेन। ७४औँ मिनेटमा एपीएफका गोलरक्षक विशाल गुरुङ पराजित भइसकेको अवस्थामा विकास टिटुङले गोल लाइनबाट बल क्लियर गरे। ८५औँ मिनेटमा कामाहाको प्रहार बारमा ठोक्कियो।
मच्छिन्द्रका प्रशिक्षक गणेश कटुवालले जित निकाले पनि टिमको खेल अपेक्षाअनुसार हुन नसकेको बताए। निरन्तर प्रतियोगिता खेलेका कारण खेलाडीले पर्याप्त आराम नपाउँदा प्रदर्शन प्रभावित भएको उनको भनाइ थियो। उता, एपीएफका प्रशिक्षक तोप विष्टले अव्यवहारिक खेल तालिकाका कारण खेलाडी थकित भएको र त्यसले प्रदर्शनमा असर पारेको बताए।
प्रतियोगिताको पहिलो सेमिफाइनल खेल बुधबार आयोजक काँकरभिट्टा फुटबल ट्रेनिङ सेन्टर र धरान फुटबल क्लबबीच हुनेछ। काँकरभिट्टाले उद्घाटन खेलमा जर्जियन एफसीलाई पराजित गर्दै, भने धरानले उज्बेकिस्तानको ब्ल्याक बुल्सलाई हराउँदै सेमिफाइनलमा स्थान सुरक्षित गरेका थिए।
