काठमाडौं । इण्डियन प्रिमियर लिगमा नेपाली बलर सन्दिप लामिछाने अनसोल्ड रहेका छन् । लिलामीको पहिलो राउण्डमा उनलाई किन्न कुनै पनि टिमले चासो देखाएनन् ।
अघिल्लो मेगा अक्सनमा २० लाख भारुमा दिल्ली क्यापिटल्सले लिएका सन्दिपलाई ३ वर्षपछि दिल्लीले यो सिजनको अगाडि रिलिज गरेको थियो ।
यो अक्सनका लागि सन्दिपको बेस मूल्य ४० लाख तोकिएको थियो । यो सिजनका लागि क्रिकेट एसोसिएसन अफ नेपाल (क्यान)ले ८ जना खेलाडीको नाम पठाएको भए पनि अन्तिम अक्सनसम्म सन्दिप मात्रै पुगेका थिए । सन्दिप गएको सिजन पनि दिल्लीको तर्फबाट एक खेल पनि खेल्न पाएका थिएनन् ।
त्यसैगरी दक्षिण अफ्रिकी अलराउण्डर क्रिस मोरिस इन्डियन प्रिमियर लिग आईपीएल ट्वेन्टी ट्वेन्टी क्रिकेटमा सबैभन्दा महङ्गा खेलाडी बनेका छन् । चेन्नईमा भएको अक्सनमा मोरिसलाई राजस्थान रोयल्सले १६ करोड २५ लाख भारतीय रुपैयाँमा खरिद गरेको हो ।
न्यूनतम मूल्य ७५ लाख तोकिएका उनलाई राजस्थानले आईपीएलकै इतिहासमा सबैभन्दा बढी रकममा किनेको हो । यसअघि यो रेकर्ड भारतीय पूर्व क्रिकेटर युवराज सिंहको नाममा १६ करोड भारुको रहेको थियो ।
त्यसैगरी अष्ट्रेलियन खेलाडी ग्लेन म्याक्सवेल १४ करोड २५ लाख भारुमा रोयल च्यालेन्जर्स बैङ्गलोरमा गएका छन् । त्यस्तै इङ्गल्याण्डका मोइन अलीलाई चेन्नई सुपर किङ्सले ७ करोडमा किनेको छ । शिवम दुबेलाई राजस्थानले ४ करोड २० लाखमा र बंगलादेशी खेलाडी शकिब अल हसनलाई कोलकाता नाइट राइडर्सले ३ करोड २० लाखमा किनेको छ ।
अक्सनमा २ सय ९२ खेलाडी सहभागी रहेकामा २२ विदेशीसहित ६१ खेलाडी बिक्नेछन् ।
