१० वैशाख, काठमाडौँ : कोभिडको संक्रमण न्यून भएसँगै विश्वका अधिकाशं मुलुकहरुले पर्यटन क्षेत्रको विकास र विस्तारसँगै पर्यटकलाई आकर्षण गर्न विभिन्न प्याकेजहरु ल्याइरहेका छन् । विभिन्न सहुलियत दिएर आफ्नो मुलुकमा पर्यटक भित्र्याउने बेला नेपालमा भने उल्टै पर्यटकबाट लिने सरकारले विमानस्थलको सेवाशुल्क बढाएको छ ।
सरकारले विमानस्थल सेवाशुल्कका नाममा प्रतिव्यक्ति ३ हजार रुपैयाँ तिर्नुपर्ने बाध्यकारी नियम ल्याएको हो । विमानस्थल सेवाशुल्क नियमावली २०६७ लाई संशोधन गरी बनेको ‘विमानस्थल सेवाशुल्क नियमावली–२०७८’ स्वीकृत गरेसँगै पर्यटकहरुले तिर्नुपर्ने रकम बढेको हो ।
सरकारले संशोधन गरेको नयाँ नियमावलीलाई २०७७ चैत ३० गते बसेको मन्त्रिपरिषदको बैठकले स्वीकृत गरेको हो । स्वीकृत ‘विमानस्थल सेवाशुल्क नियमावली २०७८’ जारी भएको ३५ दिनपछि अर्थात् जेठ १५ बाट लागू हुने भएको छ ।
यसअघि अन्तर्राष्ट्रिय यात्रु (सार्क राष्ट्रका लागि उडान गर्ने यात्रु) को हकमा ७ सय ५० रुपैयाँ र अन्य यात्रुको हकमा १ हजार रुपैयाँ प्रतियात्रु सेवाशुल्क संकलन गरिन्थो । तर, नयाँ नियमावलीसँगै अन्तर्राष्ट्रिय यात्रुलाई प्रतिव्यक्ति ३ हजार रुपैयाँ सेवाशुल्क लाग्ने भएको छ ।
यस्तै आन्तरिक हवाई यात्रुसँग प्रतिव्यक्ति ५ सय रुपैयाँ शुल्क लिने गरी नियवमाली संशोधन भएको छ ।
नेपाल नागरिक उड्डयन प्राधिकरणले २०७१÷०७२ देखि विमानस्थलको रनवे परिर्वतनका गर्न आर्थिक स्रोत व्यवस्थापनका लागि भन्दै अन्तर्राष्ट्रिय हवाई यात्रुसँग ५ वर्षका लागि भनेर विमानस्थल विकास शुल्क उठाउन सुरु भए पनि उक्त नियम हालसम्म कायम छ । त्यति बेला प्रतिव्यक्ति १ हजार शुल्क उठाउँदै आएको थियो । नयाँ नियमावलीमा त्रिभुवन अन्तर्राष्ट्रिय विमानस्थलको रनवे पिच परिर्वतनका लागि भन्दै सुरु गरिएको विमानस्थल विकास शुल्क भने हटाइएको छ ।
सहुलियत दिनुपर्ने बेला आर्थिक भार थप्नु गम्भीर कुरा
पर्यटन व्यवसायी सरकारले बढाएको शुल्कप्रति पर्यटन व्यवसायीहरुले आपत्ति जनाउँदै फिर्ता लिन आग्रह गरेका छन् । कोभिडबाट भर्खरै तंग्रिन थालेको पर्यटन क्षेत्रमा सरकारले पर्यटकबाट थप आर्थिक भार लिनु गलत भएको नेपाल एसोसिएसन अफ टुर एन्ड ट्राभल एजेन्टस (नाट्टा) का निवर्तमान अध्यक्ष अच्यूत गुरागाईंले भने ।
पर्यटन क्षेत्रको विकासमा सरकार गम्भीर नभएको तथा सरकारी कर्मचारीको लहैलहैमा लागेर मन्त्रीहरुले पनि सेवाशुल्क बढाएर धराशायी बनेको पर्यटनलाई झनै समस्यामा पार्न खोजेको गुरागाईंको आरोप छ ।
शुल्क बढाउँदा पर्यटकमाथि आर्थिक भार बढेसँगै हवाई भाडामा समेत वृद्धि हुने भएकाले यो निर्णय तत्कालै खारेज गर्नुपर्ने ट्रेकिङ एजेन्सिज एसोसिएन अफ नेपाल (टान) का अध्यक्ष खुमबहादुर सुवेदीको भनाइ छ । निजी क्षेत्रसँग कुनै समन्वय नै नगरी एक्कासि शुल्क बढाएर नेपालमा पर्यटकहरु आउन नदिने खेल सुरु भएकोले यो सच्याउन आवश्यक रहेको उनले बताए ।
सरकारले बढाएको सेवा शुल्कको विषयमा आधिकारिक धारणा बनाउने र केही दिनभित्रै व्यवसायीहरुबीच छलफल अघि बढाउने निजी क्षेत्रले बताएको छ ।
कुन विमानस्थलमा कति शुल्क लाग्छ ?
नयाँ नियमावलीअनुसार पोखरा, गौतमबुद्ध, लुक्ला, जोमसोम, नेपालगन्ज, चन्द्रगढी, विराटनगर, राजविराज, जनकपुर, सिमरा, भरतपुर, सुर्खेत र धनगढी विमानस्थलबाट यात्रा गर्नेले यात्रुसेवा शुल्कबापत ४ सय रुपैयाँ तिर्नुपर्ने छ ।
यस्तै मेघौली, सिमीकोट, जुम्ला, रारा, ताप्लेजुङ, थामखर्क, भोजपुर, लामीडाँडा, रुम्जाटार, तुम्लिङटार, फाप्लु, रामेछाप, खानीडाँडा, दाङ, मनाङ, बाजुरा, डोल्पा, डोटी, बैतडी, रुकुम सल्ले, रुकुम चौरजहारी, बझाङ र साँफेबगर विमानस्थलबाट यात्रा गर्दै प्रतियात्रु ३ सय रुपैयाँ तिर्नुपर्नेछ ।
यसैगरी माथि उल्लेख नभएका विमानस्थलको हकमा २ सय रुपैयाँ सेवा शुल्क लाग्ने नयाँ नियमावलीमा व्यवस्था गरिएको छ।
क्यापिटलनेपालबाट
