ऊर्जामन्त्री श्रेष्ठ बैंकक प्रस्थान, अन्तरिक्ष अनुप्रयोग सम्मेलनमा सहभागिता जनाउने

ऊर्जा, जलस्रोत तथा सिँचाइमन्त्री विराजभक्त श्रेष्ठ थाइल्याण्डको राजधानी बैंकक प्रस्थान गरेका छन्। एसिया तथा प्रशान्त क्षेत्रमा दिगो विकासका लागि अन्तरिक्ष अनुप्रयोगसम्बन्धी पाँचौँ मन्त्रीस्तरीय सम्मेलनमा सहभागी हुन मन्त्री श्रेष्ठ मंगलबार दिउँसो बैंकक प्रस्थान गरेका हुन्।

संयुक्त राष्ट्रसंघीय एसिया तथा प्रशान्त क्षेत्रीय आर्थिक र सामाजिक आयोग (युएन इएससीएपी) द्वारा आयोजित सम्मेलनलाई मन्त्री श्रेष्ठले बुधबार सम्बोधन गर्ने कार्यक्रम तय गरिएको छ। यस भ्रमणले नेपालको जलवायु परिवर्तनका मुद्दा र विपद् व्यवस्थापनमा अन्तर्राष्ट्रिय सहकार्यको दायरा फराकिलो बनाउन महत्वपूर्ण भूमिका खेल्ने विश्वास गरिएको छ।

कार्यशाला सम्बोधन र मन्त्रस्तरीय साइडलाइन वार्ताहरू

थाइल्याण्ड, नेपाल र युएन इएससीएपीले संयुक्त रूपमा आयोजना गरेको ‘सगरमाथादेखि सागरसम्म: एसिया-प्रशान्त क्षेत्रमा शृङ्खलाबद्ध विपद् रोक्न नेपालको भोटेकोशी-त्रिशूली घटनाले सिकाएका पाठहरू’ विषयक विशेष कार्यशालालाई मन्त्री श्रेष्ठले बिहीबार सम्बोधन गर्नेछन्। सम्मेलनका क्रममा मन्त्री श्रेष्ठले विभिन्न देशका मन्त्रीहरूसँग द्विपक्षीय तथा साइडलाइन वार्ता गर्ने उनका प्रमुख स्वकीय सचिव सञ्जीव महर्जनले जानकारी दिएका छन्।

प्रतिनिधिमण्डलमा सहभागी अधिकारीहरू र आगामी कार्यतालिका

मन्त्री श्रेष्ठको भ्रमण टोलीमा नेपाल मौसम विज्ञान विभागकी महानिर्देशक अर्चना श्रेष्ठ, ऊर्जा मन्त्रालयका शाखा अधिकृत देवचन्द्र गड्तौला, तथा जलवायु, विपद् उत्थानशीलता तथा अन्तर्राष्ट्रिय विकास विज्ञ एवं वैकल्पिक ऊर्जा प्रवर्द्धन केन्द्रका बोर्ड सदस्य अंकिता शाह सहभागी छन्। सम्मेलनका दौरान मन्त्री श्रेष्ठले विपद् पूर्वसूचना प्रणालीको विकास, क्षेत्रीय स्याटेलाइटको निःशुल्क प्रयोग र जलवायु क्षतिपूर्तिको मुद्दालाई जोडदार रूपमा उठाउने सचिवालयले जनाएको छ। विभिन्न कार्यक्रमहरू सम्पन्न गरी मन्त्री श्रेष्ठ आगामी शनिबार स्वदेश फर्किने कार्यतालिका रहेको छ।