रोशनराज
२३ जेठ, मेचीनगर : “सुरक्षित डिजिटल समाज निर्माण अभियान” विषयक सचेतनामूलक प्रशिक्षण र विद्यार्थी सम्मान कार्यक्रम गर्दैं मेचीनगर लेडी जेसिजको जेसिज सप्ताह शनिबारबाट औपचारिकरुपमा सम्पन्न भएको छ ।
१५ जेठमा १९ औँ गणतन्त्र दिवसका अवसर पारेर आयोजित सप्ताह मिनी म्याराथन (रोड रनिङ) बाट शुरु भएर प्रशिक्षण र विद्यार्थी सम्मान गरी सम्पन्न भएको मेचीनगर लेडी जेसिजको सचिवालयले जनाएको छ । समापनका दिन जिल्ला प्रहरी कार्यालय झापाका प्रमुख प्रहरी उपरीक्षक बसुन्धरा खड्काले मल्टिमिडिया र भिडियो तथा केस स्टडीमार्फत डिजिटल अपराध, साइवर ठगी तथा विभिन्न आपराधिक गतिविधिको तथ्याङ्क प्रस्तुत गरीन् । समापन समारोहका प्रमुख अतिथि समेत रहेकी प्रहरी उपरीक्षक खड्काले प्रशिक्षणका क्रममा आफू कसरी सुरक्षित रहने र सुरक्षित समाज निर्माणमा सबैले भूमिका निर्वाह गर्ने भन्ने विषयमा जानकारी दिईन् । प्रविधि मानिसका लागि नभई नहुने कला भए पनि कहिले काहि प्रविधिको सहि प्रयोग नगर्दा समस्यामा परेका थुप्रै घटना रहेको प्रहरी उपरीक्षक खड्काले जानकारी गराईन् ।
मेचीनगर लेडी जेसिजको सचिवालय परिसरको ज्येष्ठ नागरिक हलमा आयोजित समापन समारोहमा मेची उद्योग बाणिज्य संघ मेचीनगरका महासचिव एवम् मेचीनगर लेडी जेसिजको मातृशाखा धुलावारी जेसिजका पूर्व अध्यक्ष ध्रुव कनाल, मेचीनगर लेडी जेसिजको आजीवन सदस्य सीता गुरुङ, श्री बालसुबोधिनी माध्यमिक विद्यालय मेचीनगर-१४ का प्रधानध्यापक विश्व थापा, तारापुञ्ज अंग्रेजी माध्यमिक विद्यालय मेचीनगर—६ का प्रिन्सिपल प्रकाश (ओमप्रकाश) दाहाल, नेपाल पत्रकार महासंघ कोशी प्रदेश समिति उपाध्यक्ष अम्बिका (चन्द्रकला) भण्डारी, मेचीनगर नगरपालिकाका पूर्व जनप्रतिनिधि कृष्ण कनाल, लायन्स क्लब अफ काँकरभिट्टाका अध्यक्ष दीपक कार्की, पूर्व अध्यक्षहरु सन्तोष आचार्य, नवराज प्रधानलगायतको उपस्थिति रहेको थियो ।
उनीहरुले मेचीनगर लेडी जेसिजले जेसिज सप्ताहका अवसरमा साताभरि गरेका काम निक्कै रचनात्मक र सकरात्मक रहेको भन्दैं प्रशंसा गरेका थिए ।
आयोजक संस्थाका महासचिव कृष्णकुमारी (कल्पना) उप्रेती प्रसाईले सञ्चालन गरेको कार्यक्रममा संस्थाकी २०२६ की जनसम्पर्क अधिकारी अनिता साहले आस्थावाचन र २०२६ की उपाध्यक्ष सोनिका भट्टराईले जेसिज भिजन मिसन प्रस्तुत गरेकी थिईन् ।
