मेचीनगर । झापाको मेचीनगर नगरपालिका–१४ दुवागढीमा शुक्रबार बिहान अचानक आगलागी हुँदा एक सर्वसाधारणको घरसहित लाखौँको धनमाल जलेर पूर्ण रूपमा नष्ट भएको छ। स्थानीय चूडामणि गुरागाईँको घरमा विद्युत सर्ट (Electrical Short Circuit) भई आगलागी भएको प्रहरीले जनाएको छ।
जिल्ला प्रहरी कार्यालय झापाका अनुसार आज बिहान १०:४५ बजे गुरागाईँको एकतले टिनको छानो र काठको बेराले बनेको चार कोठे घरमा अचानक आगो सल्किएको थियाे। आगलागी तीव्र रूपमा फैलिँदा घरभित्र रहेका सुनचाँदी, नगद, टेलिभिजन, दराज, पलङ, लत्ताकपडा तथा अन्य बहुमूल्य घरायसी सामग्रीहरू पूर्ण रूपमा जलेर खरानी भएका छन्।
भौतिक क्षति उच्च, मानवीय र चौपाया क्षति टर्यो
प्रहरीको प्रारम्भिक अनुमानअनुसार आगलागीबाट घर र सामान गरी करिब ४२ लाख रुपैयाँ बराबरको भौतिक क्षति भएको छ। समयमै सतर्कता अपनाइएकाले घटनामा कुनै मानवीय तथा चौपाया क्षति भने हुन नपाएको जिल्ला प्रहरी कार्यालय झापाले जानकारी दिएको छ।
दमकल र स्थानीयको प्रयासमा आगो नियन्त्रणमा
आगलागी लगतै स्थानीय बासिन्दा, नेपाल प्रहरी र मेचीनगर नगरपालिकाका दुई वटा दमकल (Fire Engine) घटनास्थलमा पुगेका थिए। सुरक्षाकर्मी र स्थानीयको संयुक्त एवं अथक प्रयासपछि बिहान करिब ११:४० बजे आगो पूर्ण रूपमा नियन्त्रणमा लिइएको थियो। घटनाबारे प्रहरीले थप कानुनी अनुसन्धान गरिरहेको जनाएको छ।