काठमाडौँ । काठमाडौंबाट धनगढीतर्फ प्रस्थान गरेको श्री एयरलाइन्सको एक भिजिटिङ विमानको ककपिटमा अचानक धुवाँ देखिएपछि आइतबार साँझ भैरहवास्थित गौतम बुद्ध अन्तर्राष्ट्रिय विमानस्थलमा आपत्कालीन अवतरण (Emergency Landing) गराइएको छ।
श्री एयरलाइन्सको उडान नम्बर SHA 227 को उक्त जहाजले आइतबार दिउँसो करिब ४ बजे त्रिभुवन अन्तर्राष्ट्रिय विमानस्थलबाट उडान भरेको थियो। उडानका क्रममा ककपिटभित्र एकाएक धुवाँ सल्किएको देखिएपछि चालक दल (पाइलट) ले तत्काल सुरक्षा सतर्कता अपनाउँदै जहाजलाई भैरहवातर्फ मोडेर सुरक्षित अवतरण गराएका हुन्।
यात्रु तथा चालक दल सकुशल, प्राविधिक अनुसन्धान सुरु
गौतम बुद्ध अन्तर्राष्ट्रिय विमानस्थल स्रोतका अनुसार विमान सुरक्षित रूपमा रनवेमा अवतरण भएको छ र जहाजमा सवार सबै यात्रु तथा चालक दलका सदस्यहरू पूर्ण रूपमा सकुशल रहेका छन्। अवतरण लगत्तै सम्बन्धित एयरलाइन्सको प्राविधिक टोलीले जहाजलाई ‘ग्राउन्डेड’ गरी विस्तृत प्राविधिक परीक्षण सुरु गरेको छ। ककपिटमा धुवाँ देखिनुको वास्तविक कारणबारे उड्डयन प्राविधिकहरूले अनुसन्धान गरिरहेका छन्।
अलपत्र यात्रु लिन अर्को जहाज परिचालन
भैरहवा विमानस्थलका जेनेरल म्यानेजर श्यामकिशोर शाहका अनुसार उक्त जहाजमा रहेका यात्रुहरूलाई गन्तव्यमा पुर्याउन श्री एयरलाइन्सले तत्कालै काठमाडौंबाट अर्को जहाज भैरहवातर्फ पठाइसकेको छ। काठमाडौंबाट गएको अर्को जहाजले भैरहवामा अलपत्र परेका यात्रुहरूलाई लिएर धनगढी प्रस्थान गर्ने प्रबन्ध मिलाइएको छ।