फ्रान्सको हिंसाले युरोपभर त्रास: के बेलायतमा पनि सल्किएला आगो?

फ्रान्समा इन्धनको मूल्यवृद्धि, महँगी र सार्वजनिक सेवाको बिग्रँदो अवस्थाविरुद्ध भएको ठूलो प्रदर्शनले युरोपभर सामाजिक असन्तुष्टिको आगो सल्काएको छ। आप्रवासन र आवास संकटलाई लिएर आन्तरिक विवाद झेल्दै आएको बेलायतमा पनि फ्रान्सकै जस्तो हिंसा भड्किन सक्ने चिन्ता व्यक्त हुन थालेको छ।

गत सप्ताहन्त फ्रान्सका विभिन्न सडकमा करिब ५ लाख ५० हजार प्रदर्शनकारी उत्रिएका थिए। प्रदर्शन शान्तिपूर्ण हुन नसक्दा पेरिस, मार्सेली, लिल तथा अन्य प्रमुख सहरहरूमा व्यापक लुटपाट र हिंसा मच्चियो। प्रदर्शनकारीले पुरातात्त्विक महत्त्वका प्राचीन भवन, कार र पसलहरूमा समेत आगजनी गरेका थिए। यसलाई फ्रान्सको आधुनिक इतिहासकै सबैभन्दा खराब घटनामध्ये एक मानिएको छ।

राष्ट्रपति म्याक्रोँको चेतावनी र प्रहरी कारबाही

हिंसा र लुटपाटले उग्र रूप लिएपछि फ्रान्सका राष्ट्रपति इमानुएल म्याक्रोँले राष्ट्रका नाममा सम्बोधन गर्दै शान्ति–सुव्यवस्था कायम गर्न कडा आह्वान गरेका छन्। प्रदर्शनले सबैमा क्रोध र लज्जा उत्पन्न गराएको उल्लेख गर्दै उनले अनियन्त्रित हिंसालाई कुनै पनि हालतमा जायज ठहर गर्न नसकिने स्पष्ट पारेका छन्। हिंसामा संलग्न व्यक्तिहरूलाई कडा कानुनी कारबाही गरिने चेतावनी दिएसँगै सुरक्षाकर्मीले हालसम्म २ हजार ५ सयभन्दा बढीलाई गिरफ्तार गरिसकेका छन् भने झडपका क्रममा १ हजार प्रहरी घाइते भएका छन्।

युरोपभर फैलँदै सामाजिक असन्तुष्टि

फ्रान्स मात्र त्यस्तो देश होइन जहाँ जीवनयापनको उच्च महँगीले नागरिकहरूलाई सडकमा उत्रिन बाध्य पारेको छ। हाल ऊर्जा मूल्यमा अत्यधिक वृद्धि र गम्भीर आवास संकटका कारण युरोपभर नै असन्तुष्टि फैलँदै गएको छ। इटालीमा आगामी नोभेम्बर २० का लागि आमहडतालको आह्वान गरिएको छ भने स्पेन र पोर्चुगलमा पनि नोभेम्बर ११ का लागि यस्तै किसिमका विरोध कार्यक्रमहरू तय गरिएका छन्। बेलायतमा पनि आप्रवासन नियम कडा पार्ने प्रस्ताव र आर्थिक दबाबकाबीच मन्त्रिपरिषद्‍भित्रै तनाव बढिरहेको छ।