भारतमा महिला बनेर एक हजार जनालाई हनी ट्र्यापमा पार्ने युवक पक्राउ

भारतको हैदराबादमा सामाजिक सञ्जालमा महिलाको नक्कली अकाउन्ट बनाएर चिकित्सक, इन्जिनियर र सरकारी अधिकारीसहित करिब एक हजार जनालाई हनी ट्र्यापमा पार्ने एक युवक पक्राउ परेका छन्। हैदराबाद प्रहरीले २३ वर्षीय पवन कुमारलाई पक्राउ गरी उनीमाथि अनुसन्धान अघि बढाएको छ।

प्रहरीका अनुसार पवनले विभिन्न व्यक्तिका नक्कली सामाजिक सञ्जाल अकाउन्टमार्फत मानिसहरूलाई फ्रेन्ड रिक्वेस्ट पठाएर कुराकानी सुरु गर्ने गर्दथे। कुराकानी बढ्दै गएपछि सेक्स च्याटसम्म पुग्ने र उनीहरूका नग्न तस्बिर तथा भिडियो मगाउने गरिएको थियो। त्यसपछि तिनै केटीको दाजु बनेर अर्को व्यक्तिले पीडितहरूसँग मोटो रकम बार्गेनिङ गर्ने गरेको प्रहरीको अनुसन्धानबाट खुल्न आएको छ।

चार वर्षदेखि चलिरहेको थियो ठगी धन्दा

चारमिनारका डिसिपी किरण खरेका अनुसार आरोपी पवनले गत चार वर्षदेखि कोलकाताकी एक मोडलसहित अन्य महिलाहरूको तस्बिर प्रयोग गर्दै आएका थिए। उनले भारतका विभिन्न राज्यका मात्र नभई विदेशमा बस्ने मानिसहरूलाई समेत यसरी धरापमा पारेर पैसा असुल्दै आएको प्रहरीले जनाएको छ।

पीडितहरूको सूचीमा विभिन्न पेसाका प्रतिष्ठित व्यक्तिहरू समेत रहेका छन्। प्रहरीका अनुसार ठगिनेहरूमा चिकित्सक, प्रहरी, व्यापारी, सरकारी अधिकारी, सफ्टवेयर इन्जिनियर र प्राध्यापकसहितका करिब १ हजार जना व्यक्ति रहेका छन्।

कसरी सुरु भयो आपराधिक गतिविधि?

तेलंगानाका पवन कुमार हैदराबादको बालानगरस्थित सेन्ट्रल इन्स्टाग्राम अफ टुल डिजाइनमा डिप्लोमा अध्ययनरत थिए। तर, दोस्रो वर्षमै पढाइ छाडेका उनले परिवारलाई भने आफू अर्को कलेजमा बीटेक पढ्दै गरेकोझुटो कुरा बताएका थिए। हैदराबादमै सानातिना काम गर्ने भनिएका उनी पूर्ण रूपमा बेरोजगार भएपछि यस्ता आपराधिक क्रियाकलापमा संलग्न भएको प्रहरीको भनाइ छ।

घटनाको अनुसन्धान गरिरहेको प्रहरीले आरोपीको साथबाट तीनवटा मोबाइल फोन, एउटा ल्यापटप र १६ जिबीको पेन ड्राइभ बरामद गरेको छ। यस विषयमा थप अनुसन्धान भइरहेको प्रहरीले जनाएको छ।