डा. गोविन्द केसीका माग पूरा गर्न सरकारलाई ४८ घण्टे अल्टिमेटम, नत्र आन्दोलनमा उत्रने चेतावनी

नेपाल चिकित्सक संघले वरिष्ठ चिकित्सक प्रा. डा. गोविन्द केसीका जायज मागहरू सम्बोधन गर्न सरकारलाई ४८ घण्टाको अल्टिमेटम दिएको छ । आमरण अनसनमा बसेको ९ दिन बितिसक्दा पनि सरकारले माग सम्बोधन नगरेकोमा गम्भीर ध्यानाकर्षण भएको जनाउँदै संघले तोकिएको समयभित्र माग पूरा नभए आन्दोलनका कार्यक्रम घोषणा गर्न बाध्य हुने चेतावनी दिएको छ ।

संघका अध्यक्ष डा. बद्री रिजाल र महासचिव डा. विश्वराज दवाडीद्वारा जारी विज्ञप्तिमा डा. केसीको स्वास्थ्यमा जटिल समस्या उत्पन्न भएको हुँदा उनको जीवन रक्षाका लागि तत्काल वार्ता टोली गठन गर्न माग गरिएको छ । यसबाट सर्वसाधारण नागरिकमा पर्न जाने स्वास्थ्यसम्बन्धी असरको पूर्ण जिम्मेवारी स्वयम् नेपाल सरकारले लिनुपर्ने विज्ञप्तिमा उल्लेख छ । संघको केन्द्रीय कार्यालयमा पूर्वअध्यक्षहरू, पूर्वमहासचिवहरू, विशेषज्ञ चिकित्सक समाजका प्रतिनिधि, अस्पताल निर्देशकहरू र आवासीय चिकित्सकहरूसँगको बृहत् छलफलपछि यो निर्णय लिइएको हो ।

डा. केसीका प्रमुख मागहरू

डा. गोविन्द केसीले न्यूनतम पूर्वाधार, आवश्यक प्राज्ञिक जनशक्ति र कानुनी मापदण्डबिना गेटामा एमबीबीएस तथा नर्सिङ कार्यक्रम सञ्चालन गर्ने तथा विभिन्न कलेजमा सिट वृद्धि गर्ने निर्णय तत्काल खारेज गर्न माग गरेका छन् । त्यस्तै, चिकित्सा शिक्षा आयोगका उपाध्यक्ष तथा विश्वविद्यालयका उपकुलपति र रजिस्ट्रारमाथि उच्चस्तरीय निष्पक्ष छानबिन गरी दोषीलाई कानुनी दायरामा ल्याउनुपर्ने उनको भनाइ छ ।

सहिद दशरथ चन्द स्वास्थ्य विज्ञान विश्वविद्यालयको शिक्षण अस्पताललाई तत्काल पूर्ण क्षमतामा सञ्चालनमा ल्याउन र सार्वजनिक तथा सरकारी संस्थामा अनिवार्य ७५ प्रतिशत छात्रवृत्तिको व्यवस्था कडाइका साथ कार्यान्वयन गर्न माग गरिएको छ । यसबाहेक इलाम, उदयपुर र डडेलधुरामा सरकारी मेडिकल कलेज स्थापना गर्ने तथा बर्दिवास मेडिकल कलेज निर्माण आयोजनासम्बन्धी विगतका सहमतिहरू शीघ्र कार्यान्वयन गर्नुपर्ने माग अघि सारिएको छ ।