नागरिकलाई केन्द्रमा राखेर परिणाममुखी काम गर्न सञ्चारमन्त्रीको निर्देशन

सूचना तथा सञ्चारमन्त्री डा. विक्रम तिमिल्सिनाले नागरिकलाई केन्द्रमा राखेर परिणाम देखिने गरी काम गर्न मन्त्रालय मातहतका निकायलाई कूटनीतिक र प्रशासनिक निर्देशन दिनुभएको छ। मन्त्रालयमा शुक्रबार आयोजित आर्थिक वर्ष २०८३–८४ को प्रथम त्रैमासिक समीक्षा तथा मन्त्रालयस्तरीय विकास समस्या समाधान समितिको बैठकलाई सम्बोधन गर्नुहुँदै मन्त्री डा. तिमिल्सिनाले सुशासन र पारदर्शितालाई आत्मसात् गर्दै आ–आफ्नो निकायबाट स्पष्ट परिणाम ल्याउन ताकेता गर्नुभएको हो।

“नागरिकलाई केन्द्रमा राखेर काम गर्ने अहिलेको सरकारको स्पष्ट नीति रहेको छ, राज्यका हरेक निकायले यसलाई कार्यान्वयन गर्नु पर्छ,” मन्त्री डा. तिमिल्सिनाको भनाइ छ, “संस्थागत सुशासन कायम गर्दै विगतका कमी कमजोरी सुधारेर अगाडि बढ्नुहोस्, त्यसका लागि मन्त्रालय जुनसुकै सहयोग गर्न तयार छ।” उहाँले संस्थाको संस्थागत गोपनीयता र पेसागत इमानदारी कायम राख्न विशेष जोड दिनुभयो।

संस्थाको हित विपरीत कार्य गरे निर्मम कारबाही

बैठकमा मन्त्री तिमिल्सिनाले संस्थालाई अहित हुनेगरी कार्य गर्ने जोकसैप्रति सरकार निर्मम रूपमा प्रस्तुत हुने चेतावनी दिनुभयो। “आफ्नो संस्थागत हितका लागि छलफल गर्नुस्, बहस गर्नुस्, सरकारलाई आएर भन्नुस्, तर संस्थालाई अहित हुनेगरी कार्य गर्ने जोकसैप्रति सरकार निर्मम रूपमा प्रस्तुत हुन्छ,” उहाँले स्पष्ट पार्नुभयो। साथै, सबै संस्थाले आफ्नो उद्देश्य प्राप्तिका लागि निश्चित योजना बनाएर अगाडि बढ्न आग्रह गर्दै त्यसका लागि मन्त्रालयको तर्फबाट सहयोगमा कमी नहुने प्रतिबद्धता व्यक्त गर्नुभयो।

जनशक्ति व्यवस्थापन र ओएनएममार्फत चुस्त संरचना

मन्त्रालय अन्तर्गतका निकायमा संस्थागत सुधार, जनशक्ति व्यवस्थापन र सङ्गठन तथा व्यवस्थापन सर्वेक्षण (ओएनएम) मार्फत चुस्त संरचना निर्माणको काम अघि बढाइएको जानकारी उहाँले दिनुभयो। संस्थाको आवश्यकता र कार्यादेशअनुसार जनशक्ति व्यवस्थापन गर्ने मुख्य जिम्मेवारी सम्बन्धित निकायको नेतृत्वको भएको उहाँको भनाइ थियो। प्रधानमन्त्रीसँग आफूले गरेको कार्यसम्पादन सम्झौता पनि मातहतका निकायको प्रभावकारी कार्यसम्पादनसँग प्रत्यक्ष जोडिएको उल्लेख गर्दै मन्त्री तिमिल्सिना, सबै तहमा जवाफदेहिताको संयन्त्रलाई थप प्रभावकारी बनाउनुपर्नेमा जोड दिनुभयो।

📄 प्रेस विज्ञप्ति / सूचना