४ जेठ, मेचीनगरः झापाको काँकरभिट्टाबाट करिव डेढ करोडको सुन र २० हजार अमेरिकी डलरसहित एक भारतीय नागरिक पक्राउ परेका छन् ।
आज साँझ ५: १० बजे मेचीनगर –६ काँकरभिट्टास्थित भन्सार ढाँटमा सशस्त्र प्रहरी बल नेपाल सीमा सुरक्षा गुल्म हे. क्वा. काँकरभिट्टावाट सशस्त्र प्रहरी सहायक निरीक्षक सन्तोषकुमार तामाङको कमाण्डमा खटिएको ९ जना र मेची भन्सार कार्यालयबाट खटिएको ६ जनाको संयुक्त टोलीले भारतबाट नेपालतर्फ सिटी सफारीमा आउँदै गरेका भारत पश्चिम बंगाल कोलकात्ता बस्ने वर्ष ३९ का परम पाठकलाई पक्राउ गरेको हो । उनलाई शंका लागेर चेकजाँच गर्दा उनको साथबाट सुन ,अमेरिकी डलर,भारतीय रुपैयाँलगायत बरामद भएको हो ।
