काठमाडौँ : सरकारले राष्ट्रिय सम्मानसहित अन्त्येष्टि गर्ने निर्णय गरेपछि ‘जेन-जी’ आन्दोलनका क्रममा मृत्यु भएका ६ जनाको शव नेपाली सेनाको हेलिकप्टरबाट उनीहरूको गृह जिल्ला पठाइएको छ।
टिचिङ अस्पतालमा पोस्टमार्टम सकिएपछि मृतकहरूको शवयात्रा काठमाडौँको नगरपरिक्रमा गराइएको थियो। त्यसपछि, सुनसरी, उदयपुर, सिरहा, धनकुटा र संखुवासभाका मृतकहरूको शवलाई सामाजिक परम्पराअनुसार अन्तिम संस्कारका लागि परिवारका सदस्यहरूसहित हेलिकप्टरमार्फत गृह जिल्ला लगिएको नेपाली सेनाले जनाएको छ।
यसैबीच, अन्य ४ जनाको शवको भने आजै पशुपतिमा राष्ट्रिय सम्मानसहित अन्त्येष्टि गरिएको छ। सरकारले आन्दोलनका मृतकलाई सहिद घोषणा गर्ने र उनीहरूको परिवारलाई आर्थिक सहयोग गर्ने निर्णय यसअघि नै गरिसकेको छ।
