भ्रष्टाचारलाई राष्ट्रिय अपराध घोषणा गर्न जनमुक्ति पार्टीको माग

राष्ट्रिय जनमुक्ति पार्टीले मुलुकमा व्याप्त भ्रष्टाचारलाई राष्ट्रिय अपराध र यसमा संलग्न व्यक्तिहरूलाई देशद्रोही घोषणा गर्न जोडदार माग गरेको छ। बुटवलमा आयोजित एक पत्रकार सम्मेलनमार्फत पार्टीले आफ्नो १२औं राष्ट्रिय भेलाबाट पारित विभिन्न १० बुँदे समसामयिक राजनीतिक प्रस्ताव सार्वजनिक गर्दै उक्त धारणा अघि सारेको हो। रूपन्देहीमा सम्पन्न राष्ट्रिय भेलाले मुलुकको दीर्घकालीन विकास, सुशासन र नागरिक अधिकारका विषयमा महत्त्वपूर्ण निर्णय लिएको जनाइएको छ।

पार्टीका महासचिव एवं भेला संयोजक टोप अस्लामीले सरकारको हालैको ६ महिने कार्यकालको समीक्षा गर्दै वर्तमान सरकार र सत्तारूढ दलहरूले जनअपेक्षाअनुरूप काम गर्न नसकेको बताएका छन्। उनले जेनजी आन्दोलनको मर्म र भावनाअनुसार सरकारले काम गर्न नसकेको आरोप लगाउँदै आगामी दिनमा कार्यशैली सुधार नभए राष्ट्रिय तहमा निराशा अझ गहिरिने चेतावनी दिएका छन्। पार्टी अध्यक्ष केशव सूर्यवंशीले समेत सरकारको कार्यसम्पादनप्रति असन्तुष्टि जनाउँदै जनताको चासो र आवश्यकतालाई प्राथमिकता दिन आग्रह गरेका छन्।

भेलाले भ्रष्टाचार न्यूनीकरणका लागि कडा कानूनी तथा संस्थागत संरचना निर्माण गर्न सरकार समक्ष माग गरेको छ। संघीय संसद्बाटै भ्रष्टाचारलाई राष्ट्रिय अपराध र भ्रष्टाचारीलाई देशद्रोही घोषणा गर्नुपर्ने, अधिकारसम्पन्न तथा पूर्ण स्वायत्त भ्रष्टाचार उन्मूलन आयोग गठन गर्नुपर्ने तथा भ्रष्टाचारसम्बन्धी मुद्दाहरू बढीमा तीन वर्षभित्र किनार लगाउने कानुनी प्रबन्ध गर्न पार्टीले जोड दिएको छ।

यसका साथै, विदेशमा बसोबास गर्ने नेपाली नागरिकहरूको मतदान अधिकार तथा नागरिकतासम्बन्धी अधिकार सुनिश्चित गर्नुपर्ने माग पनि प्रस्तावमा समेटिएको छ। राष्ट्रिय जनमुक्ति पार्टीले जेनजी आन्दोलनका प्रमुख मागहरूलाई आत्मसात गर्दै राज्यका हरेक निकायमा पारदर्शिता र सुशासन कायम गर्न सरकारको गम्भीर ध्यानाकर्षण गराएको छ।