आईसीसी टी-२० विश्वकप २०२६ को सुपर-८ अन्तर्गतको निकै रोमाञ्चक र निर्णायक खेलमा भारतले वेस्ट इन्डिजलाई ५ विकेटले पराजित गर्दै सेमिफाइनलमा आफ्नो स्थान सुरक्षित गरेको छ। कोलकाताको ऐतिहासिक इडेन गार्डेन्समा भएको यस खेलमा वेस्ट इन्डिजले प्रस्तुत गरेको १९६ रनको विशाल लक्ष्य भारतले अन्तिम ओभरमा पूरा गर्यो। भारतको जितसँगै बनेका १० कीर्तिमानहरू यस प्रकार छन्:
१. टी-२० विश्वकप इतिहासकै तेस्रो ठूलो रन चेज: भारतले वेस्ट इन्डिजविरुद्ध १९६ रनको लक्ष्य सफलतापूर्वक पूरा गर्यो। यो टी-२० विश्वकपको इतिहासमा पछ्याइएको तेस्रो ठूलो लक्ष्य हो। यसअघि २०१६ मा इंग्ल्यान्डले २३० र २००७ मा दक्षिण अफ्रिकाले २०६ रन पछ्याएका थिए।
२. भारतको नयाँ राष्ट्रिय रेकर्ड: १९६ रनको यो लक्ष्य भारतले टी-२० विश्वकपमा पछ्याएको अहिलेसम्मकै ठूलो स्कोर हो। यसअघि सन् २०१४ मा भारतले दक्षिण अफ्रिका विरुद्ध १७३ रन पछ्याएको थियो। साथै, वेस्ट इन्डिजले बनाएको १९५/५ रन भारतले पहिले बलिङ गर्दा खाएको अहिलेसम्मकै धेरै रन हो।
३. सन्जु सामसनको जादुमयी ९७ रन: सन्जु सामसनले बनाएको अविजित ९७ रन टी-२० विश्वकपमा कुनै पनि भारतीय खेलाडीले बनाएको दोस्रो ठूलो स्कोर हो। तर, लक्ष्य पछ्याउने क्रममा भने यो भारतको लागि अहिलेसम्मकै सबैभन्दा ठूलो व्यक्तिगत स्कोर हो। उनले विराट कोहलीको ८२ रनको रेकर्डलाई पनि पछि पारेका छन्।
४. सामसनको पहिलो ‘चेज’ अर्धशतक: लक्ष्य पछ्याउने क्रममा टी-२० अन्तर्राष्ट्रिय खेलमा सामसनले प्रहार गरेको यो नै पहिलो अर्धशतक हो। यसअघि लक्ष्य पछ्याउँदा उनको उच्च स्कोर ३९ रन मात्र थियो।
५. रोभम्यान पावेलको १५० छक्का: वेस्ट इन्डिजका कप्तान रोभम्यान पावेल टी-२० अन्तर्राष्ट्रियमा १५० छक्का प्रहार गर्ने पहिलो वेस्ट इन्डियन खेलाडी बनेका छन्। उनले निकोलस पुरनको १४९ छक्काको रेकर्ड तोडेका हुन्।
६. वेस्ट इन्डिजको छक्काको कीर्तिमान: यस विश्वकपमा वेस्ट इन्डिजले कुल ७६ छक्का प्रहार गर्यो। कुनै पनि एउटै प्रतियोगितामा कुनै टिमले प्रहार गरेको यो दोस्रो धेरै छक्का हो।
७. हेटमायरको व्यक्तिगत छक्का रेकर्ड: शिमरोन हेटमायरले यसै विश्वकपमा कुल १९ छक्का प्रहार गरे। यो कुनै पनि एक टी-२० विश्वकप संस्करणमा एकै ब्याटरले प्रहार गरेको सबैभन्दा धेरै छक्का हो।
८. छैटौँ पटक सेमिफाइनलमा प्रवेश: भारत टी-२० विश्वकपको इतिहासमा छैटौँ पटक (२००७, २०१४, २०१६, २०२२, २०२४ र २०२६) सेमिफाइनलमा पुग्न सफल भएको छ। योसँगै भारतले पाकिस्तान र इङ्ल्यान्डको ६-६ पटक सेमिफाइनल पुग्ने रेकर्डसँग बराबरी गरेको छ।
९. स्कोर अन्तरको नयाँ रेकर्ड: सामसनको ९७ रन र तिलक वर्माको २७ रन बीच ७० रनको अन्तर थियो। भारतको लागि टी-२० विश्वकपको एउटै इनिङ्समा पहिलो र दोस्रो धेरै रन बनाउने खेलाडीबीचको यो अहिलेसम्मकै ठूलो अन्तर हो।
१०. इडेन गार्डेन्समा अपराजित यात्रा: कोलकाताको इडेन गार्डेन्स मैदानमा भारतले लगातार ८ खेल जितेको छ। सन् २०११ पछि भारत यहाँ हारेको छैन। यो भारतको कुनै पनि एउटै मैदानमा भएको सबैभन्दा लामो विजय यात्रा हो, जसमा ५ जित वेस्ट इन्डिज विरुद्ध नै आएका छन्।
