📌 मुख्य बुँदाहरू:
- दशैँको लामो बिदामा परिवार भेटघाट तथा घुमघटTheका लागि यात्रा गर्नेहरूको संख्या बढेको छ।
- सवारी साधनमा यात्रा गर्दा रिँगटा र वाकवाकी लाग्ने समस्यालाई 'मोशन सिकनेस' भनिन्छ।
- अगाडि वा झ्यालपट्टिको सिटमा बसेर बाहिर हेर्ने तथा हलुका खानेकुरा खाएमा यो समस्या कम गर्न सकिन्छ।
दशैँको लामो सार्वजनिक बिदा सुरु भएसँगै परिवार र आफन्त भेटघाटका लागि गाउँ जाने वा घुम्न निस्कनेहरूको चहलपहल बढेको छ। तर, लामो यात्रा सबैका लागि एकसमान सहज नहुन सक्छ।
कतिपय मानिसहरूलाई यात्रामा निस्कनुअघि नै मनोवैज्ञानिक दबाब पर्ने तथा सवारी साधनमा चढ्दा रिँगटा र वाकवाकी लाग्ने 'मोशन सिकनेस' को समस्या हुने गर्छ। जेनरल फिजिशियन डा. अच्युतभक्त आचार्यका अनुसार यो कुनै रोग नभए पनि यसका विभिन्न रोकथामका उपायहरू उपलब्ध छन्।
मोशन सिकनेसको कारण र समाधान
डा. आचार्यका अनुसार यात्राका क्रममा कानको भित्री भाग, मस्तिष्क र आँखाको तालमेल नमिल्दा मोशन सिकनेसको समस्या उत्पन्न हुन्छ। यसलाई सामान्य सावधानी अपनाएर कम गर्न सकिन्छ।
गाडीमा यात्रा गर्दा अलि अगाडिको सिट वा झ्यालपट्टिको सिटमा बस्नुपर्ने उनको सुझाव छ। यात्राका दौरान मोबाइल चलाउने वा पुस्तक पढ्नेभन्दा पनि बाहिरका दृश्य हेरेर बस्नु उपयुक्त हुन्छ। साथै, यात्राअघि वा यात्रामा निस्कँदा हलुका र नरम खानेकुरा खाएमा वाकवाकी र बान्ता हुने समस्याबाट बच्न सकिन्छ।
