नेपाल प्रिमियर लिगको तेस्रो संस्करणमा डीआरएस प्रविधि प्रयोग हुने

नेपाल प्रिमियर लिग (एनपीएल) को तेस्रो संस्करणमा डिसिजन रिभ्यू सिस्टम (डीआरएस) प्रविधि प्रयोग हुने भएको छ। नेपाल क्रिकेट संघ (क्यान) ले सामाजिक सञ्जालमार्फत आगामी प्रतियोगितामा डीआरएस प्रयोग हुने औपचारिक जानकारी दिएको हो।

क्रिकेट खेलमा अम्पायरिङ त्रुटि घटाउन तथा निर्णयलाई थप निष्पक्ष र पारदर्शी बनाउन यो प्रविधिले महत्वपूर्ण भूमिका खेल्ने विश्वास गरिएको छ। क्यानका सचिव पारस खड्काका अनुसार डीआरएस प्रविधि जडानका लागि लाग्ने कुल खर्च क्यान र प्रतियोगितामा सहभागी आठवटै फ्रेन्चाइजी टोलीले संयुक्त रूपमा बहन गर्नेछन्। यसअघि नै दुई कम्पनीसँग प्रविधिको परीक्षण सम्पन्न भइसकेको र तथ्यपरकता मूल्यांकनपश्चात यो निर्णय लिइएको हो।

प्रविधिको विशेषता र खेल तालिका

क्यानका अनुसार एनपीएलमा एलबीडब्लुका लागि फुल थ्रीडी बल ट्र्याकिङ प्रयोग हुनेछ भने रनआउट, स्टम्पिङ र नो बलको पनि रिभ्यू गर्न सकिनेछ। यसबाहेक एआई माध्यमबाट ब्याटमा लागेको एज डिटेक्सन, हाइटको वाइड, छक्काको लम्बाई र उचाइ मापनसहित अन्य बलिङ एनालिटिक्स पनि उपलब्ध हुनेछ।

आगामी कात्तिक ९ गतेदेखि मंसिर ५ गतेसम्म कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने यस प्रतियोगितालाई आइसिसीबाट टी-२० लिगको औपचारिक मान्यता प्राप्त भइसकेको छ। उद्घाटन खेलमा लुम्बिनी लायन्स र सुदूरपश्चिम रोयल्स आमनेसामने हुनेछन् भने विदेशी खेलाडीहरूको सहभागिताले प्रतियोगिताप्रति थप आकर्षण बढेको छ।