बडादशैंको मुख्य दिन विजया दशमी मनाइँदै, टीकाको उत्तम साइत १०:२६ बजे

नेपालीहरूको महान् पर्व बडादशैंअन्तर्गत आज विजया दशमीको मुख्य दिन हर्षोल्लासका साथ मनाइँदै छ। आज घरका मान्यजन तथा बडाबड्यौटको हातबाट देवीको प्रसादका रूपमा टीका, समृद्धिको प्रतीक जमरा र आशीर्वाद ग्रहण गर्ने परम्परा अनुसार देशैभर यो पर्व धुमधामका साथ मनाइँदै छ।

नेपाल पञ्चांग निर्णायक विकास समितिका अनुसार यस वर्ष विजया दशमीको टीकाको उत्तम साइत बिहान १० बजेर २६ मिनेटमा तोकिएको छ। यस्तै, समितिले यसअघि नै देवी विसर्जनको साइत बिहान ८ बजेर ४९ मिनेटमा निर्धारण गरेको थियो। समितिका अध्यक्ष सहप्राध्यापक डा. पुरुषोत्तम भट्टराईका अनुसार साइतमै टीका लगाउन चाहनेहरूका लागि बिहान १०:२६ बजेको समय उत्तम भए पनि विजया दशमीको दिनभर नै टीका लगाउन सकिनेछ।

दिशा निर्देश र पारिवारिक पुनर्मिलन

समितिका अनुसार साइतमा टीका लगाउँदा टीका लगाइदिने मान्यजन पूर्वतर्फ फर्किनुपर्ने र टीका थाप्ने व्यक्ति पश्चिमतर्फ फर्किनुपर्ने शास्त्रीय नियम रहेको छ। नवदुर्गा भवानीको विधिपूर्वक पूजा–आराधना गरी राखिएको जमरा र टीका ग्रहण गर्ने क्रममा आज आफन्तजन तथा परिवारका सदस्यहरू एकै ठाउँमा भेला हुन्छन्।

रोजगारी, अध्ययन तथा विभिन्न पेसा र व्यवसायको सिलसिलमा घरबाट टाढा रहेका नेपालीहरू पनि बडादशैं मनाउन आफ्नै थातथलो र परिवारकहाँ फर्कने भएकाले यस पर्वले पारिवारिक पुनर्मिलन र सामाजिक सद्भाव अभिवृद्धि गर्न ठूलो महत्त्व राख्दै आएको छ।