युरोपमा अत्यधिक गर्मीले ५० हजारभन्दा बढीको मृत्यु, दुईतिहाइ मृत्युमा जलवायु परिवर्तन जिम्मेवार

यस वर्षको गर्मीयाममा युरोपभर अत्यधिक तापक्रमका कारण ५० हजार ३९१ जनाको ज्यान गएको एक नयाँ अध्ययनले देखाएको छ। तीमध्ये झन्डै दुईतिहाइ मृत्युका घटनामा मानव गतिविधिबाट उत्पन्न जलवायु परिवर्तन प्रत्यक्ष रूपमा जिम्मेवार रहेको अनुसन्धानकर्ताहरूले औँल्याएका छन्।

अनुसन्धानकर्ताहरूले गएको जुनदेखि अगस्टसम्म युरोपका ८५४ शहरमा यो अध्ययन गरेका थिए। अध्ययनअनुसार जलवायु परिवर्तनका कारण थपिएको तापक्रमसँग सम्बन्धित घटनाका कारण मात्र ३२ हजार ६१९ जनाको ज्यान गएको छ। तर, यो अध्ययनले युरोपको कुल जनसङ्ख्याको झन्डै ४० प्रतिशत हिस्सालाई मात्र समेटेकाले गर्मीका कारण ज्यान गुमाउनेको वास्तविक सङ्ख्या अझ धेरै हुन सक्ने अनुसन्धानकर्ताहरूको भनाइ छ।

औद्योगिक युगको तुलनामा २.५ डिग्री बढ्यो तापक्रम

इम्पेरियल कलेज लन्डनकी जलवायु वैज्ञानिक तथा अध्ययनकी प्रमुख लेखक क्लेयर बार्न्सका अनुसार जीवाश्म इन्धन जलाउँदा बढेको तापक्रमले सामान्यतः असहज हुने गर्मीलाई खतरनाक र ज्यानै लिन सक्ने अवस्थामा पुर्‍याएको छ। युरोपको तापक्रम औद्योगिक युगअघिको तुलनामा २.५ डिग्री सेल्सियस बढिसकेको छ भने यस गर्मीयाममा केही शहरको तापक्रम सामान्यभन्दा १२ डिग्री सेल्सियससम्म धेरै पुगेको पाइएको छ।

अध्ययनमा देखिए अनुसार गर्मीका कारण सबैभन्दा धेरै इटाली, फ्रान्स, स्पेन र जर्मनीका मानिसले ज्यान गुमाएका छन्। ज्यान गुमाउनेमध्ये आधाभन्दा बढी ८५ वर्ष वा सोभन्दा बढी उमेरका वृद्धवृद्धा रहेका छन्। यद्यपि, २० देखि ४४ वर्ष उमेर समूहका ८०० भन्दा धेरै व्यक्तिको पनि अत्यधिक गर्मीका कारण ज्यान गएको अध्ययनका सहलेखक ग्यारीफलोस कोन्स्टान्टिनोडिसले बताएका छन्।

जलवायु परिवर्तनको प्रभाव बढ्दो

अध्ययनले देखाए अनुसार गर्मीसम्बन्धी ज्यान गुमाउने घटनामध्ये जलवायु परिवर्तनको हिस्सा सन् २००० को दशकको शुरुआतमा ४५ प्रतिशत रहेकामा अहिले बढेर ६५ प्रतिशत पुगेको छ। यसले पृथ्वीको बढ्दो तापक्रमले मानव स्वास्थ्यमा पार्ने जोखिमलाई थप गम्भीर बनाएको वैज्ञानिकहरूको निष्कर्श छ।