आर्य फार्माल्याब र क्यानबीच तीन वर्षको सहकार्य, एनपीएलको स्वास्थ्य साझेदार

स्थापनाको ३०औँ वर्षमा प्रवेश गरेको अवसरमा आर्य फार्माल्याबले नेपाल क्रिकेट संघ (क्यान) सँग नेपाल प्रिमियर लिग (एनपीएल) को आधिकारिक स्वास्थ्य साझेदारका रूपमा तीन वर्षका लागि सहकार्य गर्ने घोषणा गरेको छ। क्रिकेट खेलमार्फत स्वास्थ्य सचेतना अभिवृद्धि गर्ने र खेलकुद तथा जनस्वास्थ्यबीचको सम्बन्धलाई थप सुदृढ बनाउने मुख्य उद्देश्यसहित यो साझेदारी गरिएको कम्पनीले जनाएको छ।

आफ्नो तीन दशक लामो यात्रालाई सामाजिक उत्तरदायित्व र जनस्वास्थ्य प्रवर्द्धनसँग जोड्दै आएको आर्य फार्माल्याबले एनपीएलको मञ्चमार्फत आम नागरिकलाई आधारभूत स्वास्थ्य परीक्षण, स्वास्थ्य परामर्श तथा स्वस्थ जीवनशैलीबारे जानकारी गराउने लक्ष्य राखेको छ। यस सहकार्यले खेलकुद र स्वास्थ्य क्षेत्रबीचको पुलको रूपमा काम गर्ने विश्वास लिइएको छ।

मैदानमा स्वास्थ्य शिविर तथा विभिन्न गतिविधि

यस साझेदारीअन्तर्गत एनपीएलका खेलहरू भइरहेको कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा विभिन्न किसिमका गतिविधिहरू सञ्चालन भइरहेका छन्। मैदानमा आर्य फार्माल्याबले स्वास्थ्य परामर्श कक्ष, स्वास्थ्य परीक्षण स्टल र जनचेतनामूलक कार्यक्रमहरू आयोजना गरेको छ। यसले खेल अवलोकन गर्न आउने दर्शकहरूलाई मनोरञ्जनका साथै आफ्ना स्वास्थ्यप्रति सचेत रहन प्रेरित गर्ने अपेक्षा गरिएको छ।

खेलाडी र दर्शकलाई नगद पुरस्कारसहित सम्मान

क्रिकेट खेलाडीहरूको उत्कृष्ट प्रदर्शन र उच्च खेल भावनालाई प्रोत्साहन गर्न आर्य फार्माल्याबले 'हेल्दी पार्टनरसिप अवार्ड' स्थापना गरेको छ। यस पुरस्कारमार्फत प्रत्येक खेलमा दुई जना खेलाडीलाई जनही २५–२५ हजार रुपैयाँ नगद पुरस्कारसहित सम्मानित गरिनेछ।

यसका साथै, खेल मैदानमा उपस्थित हुने दर्शकहरूको सहभागिता र उत्साह थप बढाउन प्रत्येक खेलमा एक जना भाग्यशाली दर्शकलाई २० हजार रुपैयाँ राशि रहेको 'हाटविट मुमेन्ट अफ द म्याच' प्रदान गरिनेछ। कम्पनीले यी कार्यक्रमहरूले खेलाडीको योगदानको कदर गर्नुका साथै समग्र प्रतियोगितालाई नै थप रोचक बनाउने विश्वास व्यक्त गरेको छ।