चक्रवात ‘अर्नब’ को प्रभाव: आजदेखि वर्षा सुरु, शनिबारसम्म सतर्क रहन आग्रह

बङ्गालको खाडीमा विकसित अति शक्तिशाली चक्रवात ‘अर्नब’ को प्रभाव नेपालमा पर्न थालेको छ। यस प्रणालीको असरस्वरूप आज दिउँसोदेखि देशका विभिन्न भूभागमा वर्षा सुरु हुने र भोलिदेखि शनिबारसम्म मौसम थप प्रतिकूल बन्ने मौसम पूर्वानुमान महाशाखाले जनाएको छ।

पश्चिममध्य बंगालको खाडीमा उत्पन्न चक्रवात अर्नब भारतको आन्ध्र प्रदेश र यानमको तटीय क्षेत्रबाट जमिनमा प्रवेश गरिसकेको छ। जमिन प्रवेश गरेसँगै उक्त प्रणाली क्रमशः उत्तर-उत्तरपश्चिम दिशातर्फ सर्दै कमजोर हुँदै गएको र उत्तर प्रदेश तथा बिहार आसपास पुग्ने पूर्वानुमान गरिएको छ। यसको प्रभावले हाल नेपालका केही भूभागमा साधारणतया बादल लागेको तथा लुम्बिनी प्रदेशका एकदुई स्थानमा हल्का वर्षा भइसकेको मौसमविद्हरूले बताएका छन्।

विभिन्न प्रदेशमा भारी वर्षा र हिमपातको सम्भावना

मौसमविद्हरूका अनुसार आजदेखि शनिबारसम्म कोशी, मधेश, बागमती, गण्डकी र लुम्बिनी प्रदेशका अधिकांश स्थानमा मेघगर्जन र चट्याङसहित मध्यम वर्षा तथा हिमपात हुन सक्नेछ। यसैगरी कर्णाली र सुदूरपश्चिम प्रदेशका पहाडी तथा तराई भूभागका धेरै स्थानमा मेघगर्जन, चट्याङ र असिनासहित मध्यम वर्षा तथा हिमपातको सम्भावना रहेको छ। विशेषगरी कोशी, मधेश, बागमती, गण्डकी र लुम्बिनी प्रदेशका थोरै स्थानमा भारी तथा एकदुई स्थानमा अति भारी वर्षा हुन सक्ने विभागले जनाएको छ।

कृषि कार्य र यात्रामा सतर्कता अपनाउन अपिल

अतिवृष्टि र हिमपातको सम्भावनालाई मध्यनजर गर्दै मौसम पूर्वानुमान महाशाखाले धानबाली भित्र्याउनेलगायत महत्त्वपूर्ण कृषि कार्य आगामी शनिबारसम्म स्थगित गर्न वा मौसमको स्थिति हेरेर मात्र अघि बढाउन आग्रह गरेको छ। साथै, उच्च पहाडी तथा हिमाली क्षेत्रमा पर्वतारोहण, पदयात्रा र पर्यटन गतिविधिमा संलग्न पर्यटकहरूलाई मौसम अनुकूल नभएसम्म सुरक्षित स्थानमा रहन सुझाइएको छ। चक्रवातका कारण हुन सक्ने बाढी, पहिरो, सडक अवरोध तथा हवाई यातायात प्रभावित हुने जोखिमलाई ध्यानमा राख्दै सर्वसाधारण र सम्बन्धित निकायलाई आवश्यक पूर्वतयारी अपनाउन अपिल गरिएको छ।