📌 मुख्य बुँदाहरू:
- सरकारले यस वर्षको हिउँदमा हुने शीतलहर र हिमपातको जोखिमबाट बच्न पूर्वतयारी थालेको छ।
- मध्य मङ्सिरदेखि मध्य फागुनसम्म तराईमा शीतलहर तथा उच्च हिमाली क्षेत्रमा हिमपातको जोखिम रहनेछ।
- वायु प्रदूषण गम्भीर बनेमा विद्यालय बन्द गर्ने र सवारीमा जोरबिजोर प्रणाली लागू गर्ने तयारी गरिएको छ।
- गर्भवती, बालबालिका, ज्येष्ठ नागरिक र दीर्घरोगीलाई चिसोबाट बचाउन विशेष सतर्कता अपनाउन आग्रह गरिएको छ।
सरकारले यस वर्षको हिउँदमा हुन सक्ने शीतलहर र हिमपातबाट जनधनको क्षति हुन नदिन पूर्वतयारीको काम तीव्र पारेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले तराई क्षेत्रमा शीतलहर तथा उच्च पहाडी र हिमाली क्षेत्रमा पर्ने हिमपातको सम्भावित जोखिमलाई ध्यानमा राख्दै आवश्यक प्रतिकार्य योजना अघि बढाएको हो।
प्राधिकरणका कार्यकारी प्रमुख डा. धर्मराज उप्रेतीले शीतलहर र हिमपातलाई सामान्य मौसमी अवस्थाका रूपमा मात्र लिन नहुने बताएका छन्। उनले सम्भावित जोखिमबाट बच्न समयमै पूर्वतयारी र प्रतिकार्य योजना बनाउनुपर्नेमा जोड दिएका छन्। मध्य मङ्सिरदेखि मध्य फागुनसम्म तराईमा शीतलहर, कुहिरो र हुस्सु तथा उच्च पहाडी र हिमाली क्षेत्रमा हिमपातको जोखिम रहने उनको भनाइ छ। लगातार चिसो बढ्ने र बाक्लो हुस्सु लाग्ने अवस्थाले जनजीवन प्रभावित पार्न सक्ने प्राधिकरणले जनाएको छ।
यातायात र स्वास्थ्य सुरक्षामा विशेष सतर्कता
शीतलहरसँगै वायु प्रदूषणको जोखिमसमेत बढ्ने भएकाले स्वास्थ्य सुरक्षामा विशेष ध्यान दिनुपर्ने प्राधिकरणले औँल्याएको छ। वायु प्रदूषण अत्यधिक बढेर अवस्था गम्भीर बनेमा विद्यालय बन्द गर्ने, गाडीमा जोरबिजोर प्रणाली लागू गर्ने र निर्माण कार्य रोक्नेसम्मका उपाय अपनाउनुपर्ने कार्यकारी प्रमुख उप्रेतीले बताएका छन्। बाक्लो हुस्सु र तुवाँलोका कारण हवाई तथा सडक यातायात प्रभावित हुनुका साथै दुर्घटनाको जोखिम पनि बढ्ने गर्दछ। दृश्यता ५० मिटरसम्म सीमित हुने भएकाले सवारी सञ्चालन र हवाई उडानमा विशेष सतर्कता अपनाउनुपर्नेमा उनले जोड दिएका छन्।
जोखिमयुक्त वर्गका लागि राहत तथा न्यानो कपडा वितरण
त्यस्तै, दुई हजारदेखि दुई हजार पाँच सय मिटरभन्दा माथिका भूभागमा हिमपात हुन सक्ने भएकाले स्थानीय बासिन्दा, पर्यटक र यात्रुको सुरक्षाका लागि आवश्यक प्रबन्ध मिलाउन थालिएको छ। शीतलहरको समयमा गर्भवती, नवजात शिशु, बालबालिका, ज्येष्ठ नागरिक र दीर्घरोगीलाई चिसोबाट जोगाउन विशेष ध्यान दिनुपर्ने सुझाव दिइएको छ। जोखिमयुक्त क्षेत्रमा दाउरा वितरण गर्ने तथा विपन्न परिवारलाई न्यानो कपडा र कम्बल उपलब्ध गराउने तयारी गर्न पनि सम्बन्धित निकायलाई आग्रह गरिएको छ।
