प्रतिपक्षको आवाज दबाएर होइन, जनताको विश्वास जितेर सरकार बलियो हुन्छ : निर्मला क्षेत्री

काठमाडौँ । सत्ता जनमतबाट प्राप्त भए पनि त्यसको औचित्य जनताप्रतिको जवाफदेहिताबाट मात्र स्थापित हुने नेपाली कांग्रेसकी नेतृ तथा लुम्बिनी प्रदेशकी पूर्व सचेतक निर्मला क्षेत्रीले बताएकी छिन्। वर्तमान सरकारलाई आफ्नो कार्यशैली सच्याउन र विधिको शासनप्रति प्रतिबद्ध रहन सुझाव दिँदै उनले प्रतिपक्षको आवाज दबाएर सरकार बलियो हुन नसक्ने स्पष्ट पारेकी छिन्।

इनम सापकोटा प्रकरणलाई लिएर सरकारको कार्यशैलीप्रति गम्भीर प्रश्न उठाइएको छ। प्रहरी हिरासतमा रहेका अभियुक्तको मोबाइल फोन फरेन्सिक परीक्षण हुनुअघि प्रधानमन्त्रीका प्रमुख सल्लाहकारले आफ्नै घरमा राखेको भन्ने विवरण सार्वजनिक हुनु गम्भीर विषय भएको क्षेत्रीको भनाइ छ। उक्त विषयमा सरकारले मौनता साँध्नुभन्दा तथ्य सार्वजनिक गरी निष्पक्ष छानबिन सुनिश्चित गर्नुपर्ने उनले जोड दिइन्।

प्रतिपक्षको खबरदारी र लोकतान्त्रिक मूल्य

लोकतन्त्रमा सरकारका राम्रा काममा समर्थन गर्नु र गलत निर्णय, कमजोरी तथा स्वेच्छाचारी कार्यशैलीमाथि प्रश्न उठाउनु प्रतिपक्षको संवैधानिक जिम्मेवारी भएको क्षेत्रीले बताइन्। उनले कांग्रेस सभापति गगनकुमार थापाको नेतृत्वमा लोकतन्त्र, नागरिक अधिकार र विधिको शासनको पक्षमा भइरहेको खबरदारी समयसापेक्ष रहेको उल्लेख गरिन्।

बलियो सरकार हुनु लोकतन्त्रका लागि सकारात्मक भए पनि बलियो सरकारको अर्थ प्रश्नरहित सत्ता नहुने उनको भनाइ छ। जनताको मतबाट प्राप्त शक्तिलाई आलोचना सुन्ने, कमजोरी सच्याउने र राज्यका संस्थालाई निष्पक्ष बनाउने अवसरका रूपमा लिनुपर्ने उनले सुझाव दिएकी छिन्।