📌 मुख्य बुँदाहरू:
- त्रिभुवन अन्तर्राष्ट्रिय विमानस्थलको ब्यागेज व्यवस्थापनलाई थप पारदर्शी र व्यवस्थित बनाइएको छ ।
- आगमन कक्षको ब्यागेज क्लेम क्षेत्रमा ब्यागेज ड्रप एरियाको प्रत्यक्ष दृश्य (लाइभ फिड) उपलब्ध गराइएको छ ।
- नयाँ व्यवस्थाले यात्रुलाई सामानको अवस्था र प्रतीक्षा समयबारे जानकारी लिन सहज हुने विश्वास गरिएको छ ।
त्रिभुवन अन्तर्राष्ट्रिय विमानस्थलमा यात्रुहरूको ब्यागेज व्यवस्थापनलाई थप पारदर्शी, व्यवस्थित र यात्रुमैत्री बनाउने उद्देश्यले नयाँ प्रविधि जडान गरिएको छ। अब अन्तर्राष्ट्रिय उडानमार्फत नेपाल आउने यात्रुले ब्यागेज ड्रप एरियाको प्रत्यक्ष दृश्य (लाइभ फिड) आगमन कक्ष (अराइभल एरिया) को ब्यागेज क्लेम क्षेत्रबाटै हेर्न सक्ने व्यवस्था मिलाइएको छ।
यस व्यवस्थाअनुसार अन्तर्राष्ट्रिय उडानबाट नेपाल आउने यात्रुले आफ्नो सामान विमानबाट झारिएपछि ब्यागेज बेल्टसम्म आइपुग्ने प्रक्रियाबारे प्रत्यक्ष जानकारी प्राप्त गर्न सक्नेछन्। यसले यात्रुलाई सामानको अवस्थाबारे जानकारी लिन सहज बनाउनुका साथै ब्यागेज प्राप्त गर्न लाग्ने समयको अनुमान गर्नसमेत सहयोग पुर्याउने अपेक्षा गरिएको छ।
यात्रुको अन्योल हट्ने विश्वास
यसअघि विमानबाट झारिएको सामान ब्यागेज क्लेम क्षेत्रमा आइपुग्न लाग्ने समयबारे यात्रुले प्रत्यक्ष जानकारी पाउने व्यवस्था नहुँदा सास्ती भोग्नुपरेको थियो। सामान आउने प्रतीक्षामा यात्रुहरू अन्योलमा पर्ने तथा ब्यागेज व्यवस्थापन प्रक्रियाबारे पर्याप्त सूचना नहुँदा असहजता सिर्जना हुने गरेको थियो। नयाँ व्यवस्थाले ब्यागेज ड्रप क्षेत्रमा भइरहेको गतिविधि आगमन कक्षमै देखिने भएपछि यात्रुको प्रतीक्षा समयलाई थप सहज र व्यवस्थित बनाउने विश्वास गरिएको छ। विमानस्थलको सेवा सुधार, प्रविधिको उपयोग र यात्रुको सुविधालाई प्राथमिकतामा राख्दै पछिल्लो समय सेवा प्रवाहमा सुधारका प्रयासहरू हुँदै आएका छन्।
