तिहारमा चौबिसै घण्टਾ देउसी–भैलो खेल्न पाइने, गृह मन्त्रालयद्वारा सात सर्त जारी

गृह मन्त्रालयले नेपालीहरूको मौलिक, सांस्कृतिक तथा धार्मिक परम्पराका रूपमा रहेको तिहार पर्वका अवसरमा देउसी–भैलो कार्यक्रम सुरक्षित, मर्यादित एवं सुव्यवस्थित रूपमा चौबिसै घण्टा सञ्चालन गर्न अनुमति दिएको छ। सोमबार भएको सचिवस्तरीय निर्णय अनुसार मन्त्रालयले देशभरका सबै जिल्ला प्रशासन कार्यालयहरूलाई परिपत्र गर्दै आवश्यक सुरक्षा अपनाएर २४ सै घण्टा देउसी–भैलो खेल्न दिन निर्देशन दिएको हो।

सोमबार जारी गरिएको परिपत्रमा मौलिक कला र संस्कृतिलाई प्रोत्साहन दिने तथा सामाजिक सद्भावको संरक्षण हुने गरी अनुशासित रूपमा परम्परागत देउसी–भैलो सञ्चालन गर्न भनिएको छ। मन्त्रालयले देउसी–भैलो कार्यक्रम पूर्ण रूपमा स्वेच्छिक हुनुपर्ने स्पष्ट पार्दै कसैलाई पनि चन्दा वा दक्षिणा दिन बाध्य पार्न नपाइने व्यवस्था मिलाउन भनेको छ। साथै, विभिन्न जातजाति, धर्म, भाषा, लिङ्ग वा समुदायप्रति घृणा तथा द्वेष फैलाउने किसिमका अश्लील नृत्य, गीत, सङ्गीत वा नाराको प्रयोग गर्न पूर्ण रूपमा निषेध गरिएको छ।

तोकिएका सात सर्त तथा सुरक्षा निर्देशिका

मन्त्रालयले चाडपर्वलाई शान्तिपूर्ण र सुरक्षित रूपमा सम्पन्न गर्न विभिन्न सातवटा प्रमुख सर्त तथा निर्देशनहरू पालना गर्न भनेको छ। परिपत्रअनुसार चाडपर्व मनाउने क्रममा जुवा तथा तास खेल्न र खेलाउन पाइने छैन भने सार्वजनिक स्थानमा मदिरा सेवन गरी होहल्ला गर्न निषेध गरिएको छ। त्यस्तै, मादक पदार्थ तथा लागुपदार्थ सेवन गरेर सवारीसाधन चलाउन नदिन उचित व्यवस्था मिलाउन समेत निर्देशन दिइएको छ।

अत्यधिक ठूलो आवाजमा साउन्ड सिस्टम तथा ध्वनि उपकरणहरूको प्रयोग नगर्न आग्रह गर्दै विशेष गरी अस्पताल, वृद्धाश्रमजस्ता संवेदनशील क्षेत्रहरूमा शान्ति कायम राख्न विशेष सावधानी अपनाउन भनिएको छ। पर्वका समयमा कुनै पनि शङ्कास्पद गतिविधि देखिएमा, दुर्घटना भएमा वा कुनै समस्या आइपरेमा तुरुन्तै प्रहरी नियन्त्रण कक्षको नम्बर १०० वा आपत्कालीन कार्य सञ्चालन केन्द्रको नम्बर १२३४० मा सम्पर्क गर्न मन्त्रालयले अनुरोध गरेको छ।