भद्रपुरको काली पूजामा प्रकृति संरक्षणको सन्देश, जंगलको झल्को दिने आकर्षक पण्डाल निर्माण

झापाको भद्रपुर नगरपालिका–६ कन्हाचोकमा यस वर्षको १०औँ श्री सार्वजनिक काली पूजामा प्रकृति संरक्षणको सन्देश दिने गरी आकर्षक पूजा पण्डाल निर्माण गरिएको छ। बङ्गाली समुदायका युवाहरूले स्थापना गरेको क्लब बांग्ला भद्रपुरले हरेक वर्ष आयोजना गर्दै आएको काली पूजालाई यसपटक ‘प्रकृति संरक्षणमा जिम्मेवार बनौँ’ मानव भविष्य सुरक्षित बनाऔं भन्ने मूल सन्देशसहित विशेष स्वरूप दिएको हो।

पूजास्थलमा काली माताको मूर्ति स्थापना गरी बाँसका आकृति, माटोका घैँटा, खुत्रुके तथा विभिन्न चराचुरुङ्गीका प्रतिमा प्रयोग गरेर पण्डाल सजाइएको छ। पण्डाललाई प्राकृतिक वातावरणको झल्को दिने गरी जंगलको स्वरूपमा तयार पारिएको छ भने थर्मकलबाट निर्माण गरिएका चराचुरुङ्गीका आकृतिले थप आकर्षण थपेका छन्। परम्परागत धार्मिक आस्था र सिर्जनात्मक कलालाई जोड्दै निर्माण गरिएको पण्डालले प्रकृति संरक्षणको महत्त्वलाई समेत उजागर गर्न खोजेको क्लबका अध्यक्ष निर्मल घोषले जानकारी दिएका छन्।

जलवायु परिवर्तन र विपद् जोखिमबारे सचेतना

पछिल्लो समय जलवायु परिवर्तनका कारण बढ्दै गएका प्राकृतिक विपद्लाई मध्यनजर गर्दै पण्डालमा सचेतनामूलक प्लेकार्डसमेत राखिएका छन्। हालै भोटेकोशी नदीमा आएको बाढीले पुर्‍याएको ठूलो जनधनको क्षति तथा जलवायु परिवर्तनका कारण हिमताल विस्फोटलगायतका घटनाबाट उत्पन्न जोखिमलाई चित्रण गर्दै विपद्बाट बच्ने उपाय र त्यसका असरबारे जानकारी दिइएको छ।

अध्यक्ष घोषका अनुसार प्रकृति संरक्षणमा मानिस आफैँ जिम्मेवार हुनुपर्छ भन्ने सन्देश आम नागरिकसम्म पुर्‍याउने उद्देश्यले यस वर्षको पण्डालको थिम छनोट गरिएको हो। काली पूजालाई धार्मिक अनुष्ठानमा मात्र सीमित नराखी सामाजिक चेतना र वातावरण संरक्षणको सन्देश प्रवाह गर्ने माध्यम बनाउन खोजेको उनको भनाइ छ। प्रकृतिको संरक्षण गर्न सके मात्रै भविष्यका विपद् र जोखिम न्यूनीकरणमा सहयोग पुग्छ भन्ने सन्देश पण्डालमार्फत दिन खोजिएको आयोजकले जनाएको छ।