झापाको मेचीनगरमा हिजो राति भएको मोटरसाइकल दुर्घटनामा परी २७ वर्षीय एक युवकको मृत्यु भएको छ। मेचीनगर नगरपालिका–११ स्थित मखन मिल नजिकैको भित्री कच्ची सडक खण्डमा भएको सो दुर्घटनामा स्थानीय युवकको ज्यान गएको हो।
हिजो राति करिब ९ः३० बजे तल्लो धाइजनबाट माथिल्लो धाइजनतर्फ जाँदै गरेको मे ८ प १३२१ नम्बरको १५० सीसीको यामाहा एफजेड मोटरसाइकल तीव्र गतिका कारण आफैँ अनियन्त्रित भई दुर्घटनाग्रस्त भएको प्रहरीले जनाएको छ। दुर्घटनामा मेचीनगर–१२, सहरेडाँगी निवासी करिब २७ वर्षीय तिलकुमार पुरी गम्भीर घाइते भएका थिए।
उपचारका क्रममा निधन र प्रहरी अनुसन्धान
टाउकोमा गम्भीर चोट लागेका पुरीलाई तत्काल उपचारका लागि प्रादेशिक अस्पताल भद्रपुर लगिएको थियो। तर, उपचारकै क्रममा राति करिब १०ः३० बजे उनको मृत्यु भएको जिल्ला प्रहरी कार्यालयले जनाएको छ।
प्रहरीको प्रारम्भिक अनुसन्धानबाट तीव्र गति नै दुर्घटनाको मुख्य कारण रहेको देखिएको छ। घटनाबारे थप अनुसन्धान भइरहेको छ भने दुर्घटनाग्रस्त मोटरसाइकललाई प्रहरी चौकी चारआलीले नियन्त्रणमा लिएको छ।
