एजेन्सी ।विश्वका अरु मुलुकमा भन्दा पछिल्लो २४ घण्टाभित्र छिमेकी मुलुक भारतमा कोरोना भाइरसका नयाँ सङ्क्रमित धेरै थपिएका छन् ।
कोरोनाको दोस्रो भेरियन्टबाट विश्वमा सबैभन्दा बढी प्रभावित बनेको मुलुक भारतमा एकै दिन ३० हजार एक सय २५ जना नयाँ बिरामी थपिएका हुन् । सङ्क्रमित सङ्ख्या तीन करोड १४ लाख ३९ हजार सात सय ६४ पुगेको छ । तीन करोड छ लाख १३ हजार ४७ जना उपचारपछि निको भएका छन् ।
पछिल्लो २४ घण्टामा ४१ हजार छ सय ४८ जना सङ्क्रमणमुक्त बनेका छन् । चार लाख पाँच हजार तीन सय छ जनाको उपचार जारी छ । उपचाररतमध्ये आठ हजार नौ सय ४४ जनाको अवस्था चिन्ताजनक छ ।
एकै दिन भारतमा चार हजार १५ सङ्क्रमितको मृत्यु भयो । हालसम्म कोरोनाका कारण चार लाख २१ हजार चार सय ११ जना भारतीय नागरिकको मृत्यु भइसकेको छ । भारत कोरोना महामारीबाट प्रभावित हुनेमध्ये विश्वकै दोस्रो नम्बरमा रहेको मुलुक हो ।
कोरोनाको दोस्रो भेरियन्टबाट नराम्ररी प्रभावित बनेको भारतमा यसअघि दैनिक चार लाख भन्दा बढी नयाँ बिरामी भेटिने गरेका थिए । छ हजार जनासम्मको मृत्यु कोरोनाका कारण हुने गरेको थियो । पछिल्लो समय भारतमा सङ्क्रमण र मृत्युदर कम भएको छ ।
कोरोनाका कारण प्रभावित हुनेमध्ये विश्वकै पहिलो नम्बरमा रहेको मुलुक अमेरिकामा एकै दिन २३ हजार आठ सय १७ जना नयाँ बिरामी थपिएका छन् । सङ्क्रमित सङ्ख्या तीन करोड ५२ लाख ५६ हजार नौ सय २५ पुगेको छ । दुई करोड ९५ लाख ३६ हजार छ सय ७१ जना उपचारपछि निको भइसकेका छन् ।
पछिल्लो २४ घण्टामा १९ हजार आठ सय ४५ जना सङ्क्रमणमुक्त हुँदै सामान्य जीवनमा फर्किएका छन् । ५० लाख ९३ हजार तीन सय ५५ जनाको उपचार जारी रहेको छ । उपचाररतमध्ये आठ हजार तीन सय २३ जनाको अवस्था गम्भीर छ ।
अमेरिकामा एकै दिन ६७ सङ्क्रमितको मृत्यु भयो । कोरोनाका कारण हालसम्म मृत्यु हुने अमेरिकी नागरिकको सङ्ख्या छ लाख २६ हजार नौ सय १९ पुगेको छ ।
ब्राजिलमा पछिल्लो २४ घण्टाभित्र १८ हजार नौ सय ९९ जना नयाँ बिरामी थपिएका छन् । सङ्क्रमित सङ्ख्या एक करोड ९७ लाख सात हजार छ सय ६२ पुगेको छ । एक करोड ८३ लाख ४९ हजार चार सय ३६ जना उपचारपछि निको हुँदै सामान्य जीवनमा फर्किएका छन् ।
आठ लाख सात हजार सात सय २४ जनाको उपचार जारी छ । उपचाररतमध्ये आठ हजार तीन सय १८ जनाको अवस्था चिन्ताजनक छ । ब्राजिलमा एकै दिन पाँच सय तीन जनाको मृत्यु कोरोनाका कारण भएको छ ।
हालसम्म मृत्यु हुने सङ्क्रमितको सङ्ख्या पाँच लाख ५० हजार पाँच सय दुई पुगेको छ । विश्वमा अमेरिकापछि ब्राजिलमा धेरै सङ्क्रमितको मृत्यु भएको छ । समग्र सङ्क्रमणको हिसाबमा ब्राजिल कोरोनाका कारण प्रभावित हुनेमध्ये विश्वकै तेस्रो नम्बरमा रहेको मुलुक हो ।
विश्वमा एकै दिन चार लाख १५ हजार छ सय ९० जना नयाँ बिरामी थपिएका छन् । सङ्क्रमित सङ्ख्या १९ करोड ५२ लाख ९४ हजार आठ सय ८१ पुगेको छ । १७ करोड ७० लाख ९६ हजार दुई सय २९ जना उपचारपछि निको हुँदै कोरोनामुक्त भइसकेका छन् ।
पछिल्लो २४ घण्टामा तीन लाख ३१ हजार आठ सय ७४ जना सङ्क्रमणमुक्त हुँदै सामान्य जीवनमा फर्किएका छन् । एक करोड ४० लाख १६ हजार सात सय ३७ जनाको उपचार भइरहेको छ । उपचाररतमध्ये ८४ हजार आठ सय १७ जनाको अवस्था गम्भीर छ ।
एकै दिन विश्वमा छ हजार सात सय ८४ जनाको मृत्यु कोरोनाका कारण भएको छ । हालसम्म मृत्यु हुने सङ्क्रमितको सङ्ख्या ४१ लाख ८१ हजार नौ सय १५ पुगेको छ ।
