झापा । बिर्तामोडका एकजना पत्रकारमा कोरोना संक्रमण पुष्टि भएपछि उनको सम्पर्कमा रहेकाहरुको खोजी सुरु गरिएको छ ।
कोरोनासँग मिल्दोजुल्दो लक्षण देखिएपछि उनले शुक्रवार स्वाब परीक्षण गराएका थिए ।
रिपोर्ट पोजेटिभ आएपछि उनको सम्पर्कमा रहेकाहरुको खोजी सुरु गरिएको बिर्तामोडको स्वास्थ्य शाखाले जनाएको छ ।
संक्रमित पत्रकारको सम्पर्क १०० जनाभन्दा बढीसँग भएको प्रारम्भिक जानकारी स्वास्थ्य शाखाले लिएको हो । सम्पर्कमा रहेकामा अधिकांश पत्रकार छन् ।
झापाको धुलाबारीमा होटल मेची क्राउनले बुधबार आयोजना गरेको रात्री भोजसहितको पत्रकार सम्मेलनमा उनको पनि सहभागिता थियो ।
पत्रकार सम्मेलनमा झापा, मोरङ र सुनसरीका ६२ जना पत्रकार सहभागी थिए । पत्रकार सम्मेलन अघि र पछि होटल परिसरमा फोटो खिच्ने खिचाउने गरिएको थियो । संक्रमण भए पनि उनको स्वास्थ्य अवस्था सामान्य छ ।
चिनजानका आफन्त, मिडिया हाउसका सहकर्मीसँग पनि उनको नियमित सम्पर्क रहेको थियो । उनी संक्रमित भएपछि झापाका पत्रकारको पीसीआर परीक्षण अनिवार्य देखिएको छ ।
