काँकरभिट्टा | झापाको मेचीनगर नगरपालिकाको वडानम्बर १३ मा हालसम्म नोवल कोरोना भाइरस कोभिड १९ को संक्रमित फेला नपरेको नगरपालिकाको स्वास्थ्य शाखाले जनाएको छ ।
मेचीनगरका १५ वटा वडामध्ये अन्य वडामा गएको शुक्रबारसम्ममा सशस्त्र प्रहरी बल नेपाल बोडर आउट पोस्ट काँकरभिट्टामा कार्यरत तीनजना महिला सशस्त्र प्रहरीसहित ३५ र मेचीनगरका ८८ जना गरी कुल १ सय २३ जना संक्रमित फेला परेका भएपनि १ सय १० जना निको भएर डिस्चार्ज भइसकेको स्वास्थ्य शाखा संयोजक शशीकला राईले जानकारी दिनभयो ।
गएको बैशाख १ देखि भदौ २६ गतेको अवधिसम्ममा नगरमा पीसीआर परीक्षणका ३ हजार ५ सय ३४ जनाको थ्रोड स्वाबको नमुना संकलन गरी वीपी कोइराला स्वास्थ्य विज्ञान प्रतिष्ठान धरान, १ नम्बर प्रादेशिक प्रयोगशाला विराटनगर र मेची प्रादेशिक अस्पताल भद्रपुरको पीसीआर प्रयोगशालामा पठाएको शाखा संयोजक राईले बताउनुभयो ।
मेचीनगरको धाइजन आइसोलेनमा ९ र मेची प्रादेशिक अस्पताल भद्रपुरमा ४ गरी १३ जना आइसोलेसनमा सक्रिय संक्रमित रहेका छन् । मेचीनगरमा पुरुषको तुलनामा महिला संक्रमितको संख्या अत्यन्तै न्यून रहेको छ । नगरभरि ६७ जना पुरुष संक्रमित छन् भने महिला संक्रमितको संख्या २१ रहेको छ । नगरको ३, ८, १२ र १५ नम्बर वडामा महिला संक्रमितको संख्या शुन्य छ । स्वास्थ्य शाखाले दिएको जानकारी अनुसार अहिलेसम्म संक्रमितको संख्या सवैभन्दा बढी वडा नम्बर ६ र १० देखिएको छ । ती वडामा संक्रमितको संख्या क्रमस १६÷१६ छ । शाखा संयोजक राईका अनुसरा वडानम्बर ६ मा ४ महिला र १२ पुरुष तथा वडानम्बर १० मा ५ महिला र ११ पुरुष संक्रमित रहेका छन् ।
सवैभन्दा कम वडानम्बर ८ र १२ मा १/१ जना पुरुष संक्रमित छन् । त्यसपछि वडानम्बर ५ मा ४ महिलासहित १५ जना, वडानम्बर १ मा १ महिलासहित ८ जना, वडानम्बर २ मा १ महिलासहित ६ जना संक्रमित रहेका छन् । यसैगरी, वडानम्बर ३ मा ३ जना पुरुष, वडानम्बर ४ मा १ महिलासहित ३ जना, वडानम्बर ७ मा २ महिलासहित ५ जना, वडानम्बर ९ मा १ महिलासहित ६ जना, वडानम्बर ११ मा १ महिलासहित ३ जना, वडानम्बर १४ मा १ महिलासहित २ जना र वडानम्बर १५ मा ३ जना पुरुष संक्रमित रहेको बताइएको छ । सशस्त्र प्रहरी बल नेपाल बोडर आउट पोस्ट काँकरभिट्टामा कार्यरत संक्रमित प्रहरीमध्ये ३२ जना निको भएको बताइएकोछ ।
