झापाको मेचीनगर ६ काँकरभिट्टा स्थित प्राइम बैंककी एक कर्मचारीमा कोरोना भाईरस (कोभिड १९ ) संक्रमण पुष्टि भएको छ ।
मेचीनगर सामाजिक विकास समिति संयोजक नबिन बरालले दिनु भएको जानकारी अनुसार प्राइम बैंक काँकरभिट्टा शाखामा कार्यरत मेचीनगर वडा नं ६ की एक महिला कर्मचारीमा कोरोना संक्रमण पुष्टि भएको हो ।
गत भदौ २३ गते स्वाब संकलन गरी पीसीआर परीक्षणका लागि वीपी कोइराला स्वास्थ्य विज्ञान प्रतिष्ठान धरानस्थित पीसीआर प्रयोगशाला पठाइएको थियो ।
६१ वटा नमुना मध्ये ६० वटा पीसीआर नतिजा नेगेटिभ आउँदा १ जनाको नतिजा पोजेटिभ आएको बरालले बताउनु भयो ।
प्रयोगशालाबाट आज प्राप्त नतिजामा कोरोना संक्रमण पुष्टि भएको हो । संक्रमित महिलालाई मेचीनगर ११ स्थित धाईजन स्वास्थ्य चौकी भवनको आइसोलेशन सेन्टर लगिएको समिति संयोजक बरालले बताउनु भयो ।
आज थप एक जनामा कोरोना संक्रमण पुष्टिहुँदा मेचीनगरमा कोरोना संक्रमितको संख्या १२७ पुगेको छ ।
जसमा ११० जना संक्रमण मुक्त भई घर फर्कदा १७ जना आइसोलेशनमा उपचाररत रहेका छन् ।
यसअघि समेत प्राइम बैंक इटाभट्टा शाखाकी एक महिला कर्मचारीमा कोरोना संक्रमण पुष्टि भएको थियो ।
