लक्ष्मी उप्रेती
३० फागुन, मेचीनगर : झापाका विभिन्न पालिकामा रहेका सडकमा साइकल कुदाउँदै हिँड्नु पनि एक साहसिक काम हो । ‘घुमौं झापा साईकलमा ’ भन्ने नारासहित सामूहिक रुपमा साइकल यात्राले झापाको पर्यटन प्रवद्र्धनमा सहयोगी भूमिका खेल्ने अपेक्षा लिइएको छ ।
झापा साइक्लिङ क्लबले पहिलोपटक ‘घुमौँ झापा साइकलमा’ कार्यक्रमको शुरु गरेको छ । महिला तथा युवाको बाहिरी तथा साहसिक गतिविधिमा सहभागिता बढाउन, आन्तरिक तथा बाह्य पर्यटन, स्थानीय अर्थतन्त्र (होटल, होमस्टे, भोजन सेवा) लाई सहयोग पु¥याउन, सीमा क्षेत्र, धार्मिकस्थल, सिमसार क्षेत्र तथा ग्रामीण भूभागलाई जोड्दै झापालाई एक साइकलमैत्री गन्तव्यको रूपमा चिनाउन कार्यक्रम गरिएको हो ।
साइकल यात्राको शनिबार कोशी प्रदेश सभा सदस्य गोपाल तामाङले विधिवतरुपमा उद्घाटन गरे । उद्घाटन समारोहमा बोल्दैं कोशी प्रदेश सभा सदस्य तामाङले साइक्लिङले आन्तरिक पर्यटन प्रवद्र्धन र वातावरण संरक्षणमा सहयोग पुग्ने विश्वास समेत व्यक्त गरे । उनले हरेक मानिसलाई स्वस्थ राख्न पनि साइक्लिङले सहयोग पुग्ने बताए ।
यात्राको पहिलो दिन बाहुनडाँगी–४९ धारा–मदन भण्डारी राजमार्ग–बर्ने चिया बगान–अर्जुनधारा जलेश्वरधाम–अर्जुनधारा नगरमा पर्ने सामुदायिक वन हुँदै जामुनखाडी सिमसार भएर दोमुखामा टुंगिनेछ ।
आयोजक क्लबका सचिव हिमाल खरेलका अनुसार दोस्रो दिन ८० किलोमिटरको यात्रा हुनेछ । दोमुखाबाट सुरु भएको यात्रा माईधार–चिल्लागढधाम–शिवगञ्ज बजार–चौरी–हुलाकीमार्ग–झापा बजार–राजगढ–जलथल जंगल बनियानी हुँदै नेपालकै होचो स्थान कचनकवल पुगेर बनियानी बजारमा यात्रा टुंगिनेछ ।
तेस्रो तथा अन्तिम दिन ५० किलोमिटरको यात्रा हुनेछ । बनियानीबाट किच्चकबध–भद्रपुर–हल्दिबारी हुँदै विराटपोखरी भएर बिर्तामोडमा ‘घुमौँ झापा साइकलमा’ कार्यक्रमको अन्त्य हुने सचिव खरेलले जानकारी दिए । यात्रामा तीन महिला सहित भारत तथा नेपालका ५० जना साइकलयात्री तथा २० जना गाइड, मेकानिक र स्वयमसेवक रहेका छन् ।
झापालाई साइकल पर्यटन गन्तव्यका रूपमा प्रवद्र्धन गर्न, पूर्वी नेपालमा दिगो तथा शून्य–फोहोर पर्यटन प्रवद्र्धन गर्न, साइकलमार्फत स्वस्थ र सक्रिय जीवनशैलीलाई प्रोत्साहन गर्न कार्यक्रम आयोजना गरिएको क्लबका अध्यक्ष आकाश श्रेष्ठले बताए ।
कार्यक्रममार्फत झापाको प्राकृतिक सौन्दर्य, सांस्कृतिक सम्पदा र उदीयमान पर्यटन मार्गहरूलाई उजागर गर्दै साइकललाई वातावरणमैत्री र समावेशी पर्यटन माध्यमको रूपमा स्थापित गर्न खोजिएको छ ।
बिएन्डसी हस्पिटलले यात्राको क्रमम साइकल राइडरहरु घाइते भएमा एम्बुलेन्समार्फत उद्दार गर्नेछ भने उपचारमा समेत सहयोग गर्ने क्लबका अध्यक्ष आकाश श्रेष्ठले जानकारी दिए । यसैगरी, ‘घुमौँ झापा साइकलमा’ कार्यक्रमको आधिकारिक बीमा पार्टनर हिमालयन एभरेस्ट इन्स्योरेन्स लिमिटेड भएको छ । हिमालयन एभरेस्टले साइकल राइडर र आयोजक समितिको बीमा गरेको छ ।
हिमालयन एभरेस्टले राइडर र आयोजक समितिका सदस्य दुर्घटना भएर घाइते भएमा एक लाख रुपैयाँ उपचार खर्च र मृत्यु भएमा एक लाख रुपैयाँ उपलब्ध गराउने सहितको झापा साइक्लिङ क्लबका लागि अध्यक्ष आकाश श्रेष्ठ र हिमालयन एभरेस्टका क्षेत्रीय प्रमुख थापाबीच बीमा सम्बन्धी सम्झौतापत्रमा हस्ताक्षर भएको छ । घुमौँ झापा साइकलमा कार्यक्रम फागुन ३० गते, चैत १ र २ गते हुनेछ । कार्यक्रम दुई रात तीन दिनको हुनेछ ।
उद्घाटन समारोहमा पर्यटन कार्यालय काँकरभिट्टाका प्रमुख छविलाल खतिवडालगायतले बोलेका थिए । पर्यटन मञ्च झापाका अध्यक्ष उदयकुमार श्रेष्ठ, नेपाल एशोसिएशन टुर्स एण्ड ट्राभल एजेण्ट्स नाट्टा कोशी प्रदेशका महासचिव नवीन खरेलसहित सरकारीतथा गैर सरकारी कार्यालयका प्रमुख प्रतिनिधि, पर्यटन व्यवसायी, सञ्चारकर्मी, जनप्रतिनिधि, सुरक्षाकर्मीसहित सर्वसाधारणको उपस्थिति रहेको थियो । आयोजक क्लबका अध्यक्ष आकाश श्रेष्ठले कार्यक्रमको अध्यक्षता गर्दै औचित्य माथि प्रकाश पारेका थिए । उद्घाटन सत्रमा क्लबका उपाध्यक्ष प्रज्वल बिमलीले शब्दमार्फत स्वागत र सञ्चालन सचिव हिमाल खरेलले गरेका थिए ।
