शहिदको रगत, चियर्स !! ********************
माहत्म्य लामो छ !
युगौँदेखिको महाभारत हो यो !
कुनैबेला शिफलमा गोली चल्दा,
सिङ्गो देशको मुटु प्वाल परेको हो
कुनै बेला टेकुमा गोली चल्दा
सिङ्गो देशको टाउको छेडिएको हो!
हो, अँकुशले नबाँधिएको स्वतन्त्र र स्वच्छन्द हत्यारा
देश र देशान्तरको हितमा बोलिहिँड्ने जिब्रो काट्ने जघन्यहरु !
त्यो बेला पड्किएको गोलीको त्यो ध्वनी
हरेक वर्ष माघ १६ मा व्रम्हाण्डको एक
फन्को लगाइ आइपुग्छ ! ति दिनहरुको चित्कार अझैपनि हरेक
माघ १६ मा यो भूवनको हरेक कुना,
दुखका छानो,पिडाको भक्कानो र आशाका नयनमा नियालेर फर्कन्छन्
ति आत्मा अझैपनि
हरेक जिन्दगीको क्रमिक घोटाइमा
उनिहरुले पाएको गोलीको प्राप्ती खोज्छन् र निराश हुन्छन् !
भन्नुस्, गँगालाललाइ के नपुग्दो थियो र
गोली खाने रहर गरे ?
दशरथ चन्द्रलाई के अभाव थियो र
निरँकुशसँग जोरी खोजे ?
धर्मभक्त र शुक्रराजलाइ के सनक थियो र
ज्यान दाउमा राख्न जरुरी थियो ?
केहि थिएन !
केवल एउटै अपेक्षा थियो कि यो देशका
हरेक कुना काप्चाका पिडित र शोषित
आत्माले शास फेर्नेछन् !
यो देशका हरेक गरिब र दु:खीले जिउन
पाउनेछन्
र हरेक रैतीले गौरव र समानताको सतह भेट्नेछन् !
पाए त ?
शुक्रराजको लासको नशालु दुर्गन्धले लठ्ठ
पार्यो राक्षसहरुलाइ
थर्मभक्त,गगालाल र दशरथ चन्दको रगतको ब्यापार गरियो !
कौडी भाउ प्रति लिटरमा बेचिए ती ।
किन्यो कस्ले थाहा छ ?
यहि देशका आदर्शबादी जनताले किने तिनका रगत !
सुन्दैछु, हरेक माघ १६ मा हरेकका घरमा पाक्छ
शहिदको रगत
हरेक माघ १६ मा हरेक जनताको
दिमागले एक डोज खोज्छ
स्वतन्त्रता, आत्मगौरव, स्वाभिमान र
मान्छे हुनुको चेतनाको एक डोज !
तर हामी बिकेका छौँ !
जनता बिकेका छन् !
ति शहिदले देखेका सपनामाथि लात बजार्नेहरु
र सौदाबाजी गर्नेहरुको पैसाको बिटोमा
हामी साटिएका छौँ !
हामी कसैको झण्डा बौक्छौँ,
कसैको कार्यकर्ता हुनुमा गर्व गर्छौँ
सिङ्गो देशका खातिर मरेकाहरुको
दोहन गर्दैछौँ !
आज हरेक मान्छे आफ्नो पार्टीको हित सोच्छ
हरेक मान्छे कसैको जेहेन्दार कार्यकर्ताको परिचयपत्र
झुण्डाइ हिँड्छ !
पार्टी भन्दा केहि इन्च माथि उठ्न सक्छौ ?
गुलामी भन्दा केहि इन्च माथि उठि निर्देशक
बन्न सक्छौ ?
ति शहिद सोच्दा होलान्
हिजोआज गुण्डापनि शहिद घोषित छन् ।
आजकल दारु पिएर फोक्सो कुहिएर मरेकाहरु पनि
शहिद घोषित छन् ।
आजकल राजनैतिक भागबण्डा र स्वार्थको
किनबेचमा धेरै शहिद घोषित छन् !
मलाइ लाग्छ, स्वर्गको फ्ल्याटहरुमा
नेपालको फ्ल्याट चैँ खचाखच छ
भरिभराउ छ कोलाहाल !
व्रम्हलुटको प्राप्तीका खातिर कैयौँ शहिद निर्यात गरिए
त्यसैले यो देशमा मात्र हैन
स्वर्गको त्यो नेपाली खण्डमा पनि मारामार छ
हानाहान छ र लुछाचुँडी छ !
हामी व्यापारीहरुको छाप्रोमा छौँ
जसले शहिदका सपना र उद्धेश्य किनबेच गरे
र उनका आत्मा निर्यात गरे
केवल आफ्नो भागबण्डा र स्वार्थका खातिर !
शहिदको रगतमा पौडी खेलेर मज्जा लुट्ने
केहि अपजस त हामीलाइपनि लाग्छ
किनकी हाम्रा लागी ढलेको
कसैको शरिर देखेरपनि
हामी वुद्धिमान हुन सकेनौँ
हामीले आँफैलाइ सचेत र स्वाभिमानी बन्न दिएनौँ !
शहिदको सपनाको व्रम्हलुट त गर्यौँ गर्यौँ
तर हामीले आफ्नो जिन्दगीलाइपनि न्याय चैँ गरेनौँ !
जय होस् हत्यारा जनताको !
जय होस् लुटेरा जनताको !
जय होस् भम्पायर जनताको !
आजको दिन एक कचौरा
शहिदको रगत तपाइँलाइपनि मिलोस् शुभकामना !!
( कवि : शार्दूल )
