१२ माघ, काँकरभिट्टा : मेचीनगर नगरपालिकाको गाडीले मोटरसाइकललाई ठक्कर दिँदा एकजना युवाको आज मृत्यु भएको छ ।
पश्चिमबाट पूर्व आउदै गरेको नगरपालिकाको मे १ झ १७२ नम्बरको गाडीले टोकला चिया बगानको गेटमा बुधबार बेलुका ७ वजे विपरित दिशाबाट गईरहेको मे ९ प ७९२७ नम्बरको मोटरसाइकललाई ठक्कर दिँदा मोटरसाइकल चालक मेचीनगर–७ का ३५ वर्षीय सन्तोष राजबंशीको मृत्यु भएको जिल्ला प्रहरी कार्यालय झापाले जनाएको छ ।
ठक्कर दिने गाडी, गाडी चालक मेचीनगर–७ स्थित आयाबारीका राजकुमार प्रधान र मोटरसाइकल इलाका प्रहरी कार्यालय काँकरभिट्टाको नियन्त्रणमा रहेको छ ।
नगरपालिकाको मे १ झ १७२ नम्बरको गाडी उपप्रमुख मिना पोखरेल उप्रेती चढ्ने गरेकी थिइन् । उनी आज राष्ट्रिय सभाको चुनावमा मतदान गर्न विराटनगर गएकी थिइन् ।
उनी उतै बसेकी थिइन् भने चालक प्रधानले गाडी लिएर घर फर्कदा त्यस्तो दुर्घटना भएको नगरपालिकाले जनाएको छ ।
