युरोपमा इन्धन र महँगीको असरले चर्कियो असन्तोष, दक्षिणपन्थी दलहरूको बढ्यो प्रभाव

इन्धनको मूल्यवृद्धि र बढ्दो जीवनयापन खर्चका कारण युरोपभर व्यापक असन्तोष चर्किँदै गएको छ। महँगी, कमजोर सार्वजनिक सेवा र घट्दो क्रयशक्तिका कारण विभिन्न युरोपेली देशहरूमा प्रदर्शन तथा आन्दोलनहरू बढिरहेका छन्, जसको राजनीतिक लाभ दक्षिणपन्थी तथा लोकप्रियतावादी दलहरूले उठाउन थालेका छन्।

फ्रान्स, इटाली, जर्मनी, पोल्यान्ड, पोर्चुगल, स्पेन, बेल्जियम र अल्बानियालगायतका देशमा पछिल्लो समय जीवनयापनको बढ्दो लागत, इन्धन तथा ऊर्जा मूल्य, आवासको समस्या र सार्वजनिक सेवाको अवस्थालाई लिएर नागरिकहरूले सडक प्रदर्शन गरिरहेका छन्। आगामी वर्ष फ्रान्स, इटाली र पोल्यान्डलगायतका देशमा निर्वाचन हुन लागेकाले यो आर्थिक असन्तोषले त्यहाँको राजनीतिक समीकरणमा समेत गहिरो प्रभाव पार्न थालेको छ। कुनै समय सीमान्त राजनीतिक शक्ति मानिएका दक्षिणपन्थी दलहरू अहिले मुख्य राजनीतिक शक्तिका रूपमा स्थापित हुँदै गएका छन्।

ऊर्जा संकट र आर्थिक असर

फेब्रुअरीमा शुरू भएको अमेरिका–इरान युद्धले ऊर्जा बजारमा थप दबाब सिर्जना गरेपछि युरोपेली सरकारका लागि समस्या झनै विकराल बनेको छ। ऊर्जा मूल्यमा भएको भारी वृद्धिले मुद्रास्फीति नियन्त्रण, आर्थिक वृद्धि कायम राख्ने र सरकारी खर्च व्यवस्थापन गर्ने सरकारका प्रयासहरूमा गम्भीर चुनौती थपेको छ।

युरोपेली आयोगका अनुसार इरान द्वन्द्वका कारण व्यापार तथा ऊर्जा बजारमा आएको अवरोधबाट युरोपले करिब १०० अर्ब युरो (करिब ११२ अर्ब अमेरिकी डलर) बराबरको आर्थिक असर बेहोरेको छ। यस अवधिमा ग्यासको मूल्य करिब १४० प्रतिशतले बढेको छ भने डिजेलको मूल्य दोब्बर भएको छ।

फ्रान्समा प्रदर्शन हिंस्रक बन्दै

आर्थिक असन्तोषका बीच फ्रान्समा परिस्थिति थप जटिल बन्दै गएको छ। विद्यालयको अवस्थालाई लिएर शुरू भएको प्रदर्शन पछिल्लो समय व्यापक अशान्तिमा परिणत भएको छ। प्रदर्शनका क्रममा विभिन्न पसलहरू लुटिएका छन् भने भवनहरूमा आगजानीका घटना भएका छन्। हिंस्रक प्रदर्शनकै क्रममा लिमोजमा १९औं शताब्दीमा बनेको ऐतिहासिक नगर भवनमा समेत आगजनी गरिएको अधिकारीहरूले बताएका छन्।